Geoffrey Wever oficialmente a join partido politico FUTURO

ORANJESTAD – Despues di hopi anticipacion, rumor y bay bin di informacion, diasabra atardi actual minister demisionario pa partido RAIZ Geoffrey Wever a anuncia su entrada oficial den e partido politico nobo FUTURO. Hopi tempo tabatin rumor cu e lo a tuma e paso aki, pero ora cu siman pasa e la anuncia su retiro oficial di partido RAIZ repentinamente (pa hopi:red), e rumor a bira aun mas fuerte. Y diasabra atardi e confirmacion tabata sigur. Loke ta haci e situacion actual uno particular, ta cu Wever a dicidi cu e no ta retira como minister di RAIZ, pero ta keda den funcion, te ora cu gobierno cambia, aunke cu e ta un miembro nobo di partido RAIZ. Den un otro raportahe, lo amplia mas riba esaki. 

PARTIDO CU DOS LIDER

Loke a hala atencion ta cu e lider di partido Gerlien Croes a bisa cu lo tin un ‘novum’ unda cu politicamente lo comparti e liderazgo di e partido, pues tanto e como Geoffrey Wever lo ta na cabez di e partido. Huridicamente sinembargo por tin solamente un lider pa cual e lo asumi (esta Gerlien Croes) e liderazgo, y Wever lo ta riba# 2. Pero tur decision importante lo bay pa nan dos. A compronde cu p.e. ya caba Wever y Croes ta esunan cu ta procesa e.o. e candidatonan nobo otro, y otro desicionan crucial.

PERIODO LARGO DI NEGOSACION

Tanto Wever como Croes a confirma na e portal aki cu tabata un proceso largo di negosacion, deliberacion pa despues dicidi cu e ta un si, esta cu Wever ta join e partido aki. E motibo di e retiro di RAIZ ta keda algo ‘interno’ segun Wever a bisa e portal aki, alegando cu a opta pa esaki keda algo interno di partido y por a bisa solamente cu tabatin diferente forma di mira e vision di e partido.

DISCULPA

E miembro mas nobo di e partido a disculpa su mes tambe na e mas di 1400 votadornan cu den e eleccion anterior a vota pe riba e lista di RAIZ. E la clarifica tambe cu e no ta pasobra e ta bandona nan, sino mas bien pa no a haya tempo pa comunica cu nan tur di su decision di cambia di partido. E ta spera ademas cu e por conta cu e grupo di votadornan aki ainda, y tambe mas otro cu tin confiansa den dje. 

LISTA CLA

Croes mientrastanto riba pregunta di Noticiacla, no por a confirma si e lista ta cla, y a mas bien laga caminda habri, indicando cu ainda ta trahando riba esaki, convenciendo hende pa subi e 4 ultimo dianan cu falta prome cu nan keda cla cu esaki. No por a bisa tampoco cuanto candidato e partido lo tin ora cu nan presenta e lista otro siman diabierna. Varios persona prominente manera ex miembro di AVP Muzanine Wever y director di Wit Gele Kruis, Gino Goeloe tabata presente. A puntra si nan tambe ta riba lista, Croes a bisa solamente cu nan ta ‘miembro di e partido’, di cual Goeloe tambe a confirma e portal aki cu e ta ‘miembro’, pero no por a bisa si e ta candidato. Hunto cu Goeloe y (Muzanine) Wever, tin mas nomber cu ta circula cu por ta riba e lista, pero cu en todo caso, ta activamente sostene e partido aki.