ATA a celebra World Tourism Day 2024 cu enfoke riba evolucion nobo di turismo
ORANJESTAD - Den un discurso durante World Tourism Day Conference, Ronella Croes, CEO di Aruba Tourism Authority (A.T.A.), a enfoca riba fortalece e colaboracion entre lidernan di turismo, y tambe riba e futuro y evolucion di e industria di turismo di Aruba. Un evolucion cu lo ta dirigi riba conscientisacion cu ta cuadra cu e conceptonan di "Turismo Responsabel" y "Turismo Regenerativo."Conceptonan cu Minister di Turismo y Salubridad Publico, Sr. Danguillaume Oduber tambe a ilustra den su discurso.
“Nos ta para na un crusada, mientras cu nos ta celebra e exito, nos ta reconoce e mormuyo di cambio. Nos ta scucha e preocupacionan.” tabata palabranan di Ronella Croes, CEO di A.T.A. durante su discurso.
Nos compromiso pa e futuro ta claro. Caminda cu lo evoluciona pa un modelo di turismo cu ta genera efectonan neto positivo y aumenta e capacidad regenerativo di e sociedad y ecosistema. E transicion aki ta trece un gran responsabilidad, ya cu e lo impacta no solamente e sostenibilidad economico di Aruba, pero tambe e balans entre e nesesidadnan di nos comunidad local, e experiencia di nos huespednan, y e proteccion di nos medio ambiente. Cu enfoke clave riba strategia di modelo di High Value-Low Impact, cu lo sigui guia nos den e caminda corecto.
Ora nos ta papia di un Turismo Responsabel, nos ta enfoca riba crea un miho lugar pa biba y pa bishita. Cu Turismo Sostenibel nos lo garantisa cu nos industria ta floria infinitamente, sin degrada e medio ambiente of nos cultura. Pero nos meta ta bai mas leu cu esaki. Nos meta ta pa yega na un Turismo Regenerativo, unda nos ta busca pa mehora y restaura nos destino.
Manera otro destinacionan mundial, manera Mallorca, Barcelona, y Venezia ta enfrenta reto di Sobre Turismo, Aruba a bin ta tuma pasonan concreto, pero mester mas paso proactivo y esey ta locual a bin dilanti awe. Segun Jeremy Sampson, CEO di Travel Foundation, “Organisacionnan di Maneho y Mercadeo di Destinacion (DMMOs) (manera A.T.A.) mester ahusta nan accion pa move for di un strategia unda ta encurasha mas turismo, pa awor un strategia unda cu ta enfoca riba un balans.”
A.T.A. ta guia e esfuerso colectivo aki hunto cu socionan local, y ta evaluando continuamente su strategianan pa garantisa un futuro sostenibel pa Aruba. Un strategia cu lo enfoca riba mitiga e impacto negativo causa pa e aumento den cantidad di huesped. Nos meta no ta pa crece sin limite, pero pa stabilisa e cantidad di huepednan, gradualmente. A.T.A. lo move su enfoke pa remplasa turismo cu nos ta ricibi awor cu huespednan di balor halto cu ta balora nos mentalidad di un Turismo Responsabel, cu ta respeta nos medio ambiente y cultura, y cu ta contribui significamente na nos economia.
E strategia nobo aki lo haya un ekilibrio cu lo enfoca riba proporcionalmente tin mas huesped cu ta alinea cu nos principionan. Nos lo promove un cambio di comportacion den tur etapa di biahe di e huesped. Alabes, un cambio cu lo evoluciona e posicionamento di e marca Aruba internacionalmente.
Mientras nos ta canando riba un ruta nobo, a recorda tur socionan presente cu esaki ta un responsabilidad di nos tur pa yega na proteha nos industria di turismo. “Un Aruba Dushi pa Biba ta Un Aruba Dushi pa Bishita” ta un responsabilidad colectivo, y nos ta honra pa guia e caminda, proporcionando tur e herment y sosten necesario – na nos alcanse y conforme nos responsabilidad – pa e evolucion critico aki.
“Laga nos traha hunto pa preserva e cualidadnan cu ta hasi Aruba, no solamente un destinacion turistico excelente, pero tambe un miho luga pa biba.” tabata Ronella Croes CEO di A.T.A. su ultimo palabranan di inspiracion.
JOIA Aruba by Iberostar ta habri su porta e di tres siman di December 2024!
ORANJESTAD – E prome di e 3 hotelnan nobo den construccion na Aruba ta habri dia 18 di December 2024 definitivamente. Ta trata di JOIA Aruba by Iberostar. Esaki a keda confirma pa e ehecutivo di e hotel Dominique Meyer na Noticiacla diahuebs. ‘Si, esey ta corecto” Meyer a bisa. Esey kier men cu pa e fecha ey, lo tin e apertura di e hotel di 240 camber. E otro hotelnan ta St Regis y Secrets di otro cadena cu tambe ta habri nan porta den e proximo 6 lunanan na Aruba.
Vd Wal: No ta trata paisnan Caribense den Reino igual den cuadro di supervision financiero!
ORANJESTAD – “Paisnan Caribense den Reino no ta wordo trata igual den cuadro di supervision financiero”. Asina ex miembro di e colegio di supervision financiero pa Aruba, CAft, Hellen van der Wal a bisa recientemente den su discurso di despedida. Noticiacla den un cantidad di articulo ta reproduciendo partinan di e discurso, cu a mustra interesante unda cu van der Wal ta basta critico riba e funcionamento di e colegio. Pa loke ta su observacion riba e trato no igual, e ta mustra por ehempel con e introduccion di supervicion financiero na Sint Maarten y Corsou a bai kompañá pa restrukturashon di debe. Esaki ta splica tambe pakico e paisnan ey a bay di acuerdo na 2010 pa regula supervision financiero na nivel gubernamental. Segun van der Wal ta sigui bisa, supervision den e paisnan ei ta basa riba e asina yama regla di oro. Asina ta haci’e mas facil pa e paisnan ey haci inversionnan, specialmente pasobra a regla cu nan por fia barata via Hulanda. “LAft, di otro banda, ta enfoca riba reduccion di e debe nacional debi na e situacion financiero na e momento ey. Inversionnan mester cuadra den e presupuesto. P’esei, prestamo pa esaki ta efectivamente imposibel” van der Wal ta sigui bisa.”Prestamo ta aumenta e debe nacional. “Ademas LAft no tin ningun facilidad pa prestamo barata via Hulanda”.
Ex miembro di CAFt: Curioso cu Hulanda kier Rijkswet awor, mientras Aruba ta cumpliendo
ORANJESTAD – “Hulanda awor kier un ley di gobierno como condicion pa e refinanciamento di e fianzanan di Covid. Esey tambe ta curioso, pasobra awor Aruba tin su ciclo di presupuesto na ordo” ta palabra di ex miembro di CAFt pa Aruba, Hellen van der Wal den un discurso recien. Van der Wal durante su despedida a tene un discurso, den cual ta mustra awor cu CAFt no tur ora a funciona mes bon y corecto. Den varios articulo, Noticiacla lo reproduci esaki e proximo dianan. Van der Wal a trece varios di su observacionan den su discurso, den cual ta nota cu e tabata ‘basta’ auto critico riba e trabou cu CAFt a haci durante e periodo cu e tabata miembro.
ATIA: Efecto di welga di wafnan na Merca por tin efecto pa Aruba
ORANJESTAD – Como gremio comercial ta sumamente importante pa keda na altura di situacionan internacional cu por tin un efecto riba nos mercado local. Un situacion asina ta pasando den mundo di logistica actualmente na Merca door di un welga riba wafnan na costa oost y e asina yama “Gulf Coast”, cu ta afecta e sector di exportacion/importacion, transporte maritimo y maneho di suministro di mercancia (“supply chain management”). ATIA asina a informa kico esaki por significa pa Aruba su economia local.
Miembronan Caribense di CFT tabata kier ‘kwijtschelding parcial’ di debe di Covid
ORANJESTAD – E miembronan Caribense di e colegio di supervision financiero pa Aruba CAFt y otro islanan CFT, tabata kier ‘kwijtschelding’ parcial di debenan di sosten di likides di Covid pa e islanan Aruba, Curaçao y Sint Maarten, y di BES. Algo interesante mirando cu tur e gobiernonan a pidi esaki, pero CFT a rechasa esaki. Awor ta resulta cu internamente, cos tabata ‘diferente’.
Venezuela a exporta cerca di US$ 6 miyon na mercancia pa Aruba y Corsou den 7 luna
CARACAS - Juan Gotopo, vice presidente di Camara di Comercio di La Vela de Coro den e estado di Falcón, a declara cu pisca ta e producto nobo cu ta wordo exporta for di Venezuela pa e isla di Curacao. E vice presidente di Camara di Comercio La Vela de Coro den estado Falcón, Juan Gotopo, a informa cu den e prome 7 lunanan di e aña aki, alrededor di US$ 6 miyon na mercancia a wordo exporta for di Venezuela pa e islanan di Curacao y Aruba. .
Follow NoticiaCla
