Women’s Club of Aruba a lansa iniciativa "90 Mata pa 90 Aña"
ORANJESTAD - Recientemente Women’s Club of Aruba (WCA) a inicia nan proyecto “90 Mata pa 90 Aña” en conexion cu celebracion di su 90 aniversario sirbiendo nos isla. Cu un plantamento simbolico di e prome mata na Biblioteca Nacional Aruba – Arubiana/ Caribiana den Bachstraat kier enfoca riba mehoracion di Medio Ambiente na Aruba y pa laga un herencia duradero pa e generacion di futuro.
E acto di plantamento no solamente ta simbolisa e raiznan firme cu WCA tin den nos comunidad, pero tambe su esfuerso continuo pa yuda nos medio ambiente. Durante e periodo di e directiva di 2024-2025, lo planta 90 mata na diferente luga riba Aruba.
E evento a tuma luga den presencia di miembronan di WCA, y bishitanan distingui for di Washington, presidente Internacional di General Federation of Women’s Clubs (GFWC),
Sra. Suellen Brazil y presidente Electo Sra. Wendy Carriker, famia di Sra. Quita Croes (dfm), prome presidente local di WCA 1975 – 1976, famia di Sra. Marie Thérèse Croes (dfm) Presidente WCA 1973 - 1974 / 1985 - 1986 / 1986 – 1987, Sra. Astrid Britten, directora di Biblioteca Nacional Aruba, Sra. Zetsia Ponson, BNA Dept. Arubiana/ Caribiana Coleccion Special como tambe miembronan di Fundacion Ban Lanta y Planta.
Durante su discurso di apertura, Sra. Reina Geerman, presidente di WCA, a enfatisa e importancia di plantamento di mata local tanto como un simbolo di crecemento y sostenibilidad, como tambe pa enfatisa e compromiso di WCA pa cu Aruba. Nos tema di awe, “90 Mata pa 90 Aña, no ta solamente pa honra nos pasado, pero tambe pa inverti den futuro di nos isla stima”, Sra. Geerman a expresa.
E plantamento di e prome mata tabata posibel danki na un colaboracion cu “Ban Lanta y Planta” representa pa Sra. Anita Mijts-Aerts, Sra. Desiree Emerencia y Aruba Conservation Foundation, representa pa Sra. Natasha Silva y miembro di WCA Sra. Jan Oduber, kende a propone e iniciativa bunita aki. Sra. Anita Mijts-Aerts a duna informacion valioso tocante e cuido y sostenibilidad di e mata di Aruba cu a planta durante e ceremonia na “Palo di Boonchi”. Tur mata cu lo planta ta matanan indigeno di Aruba.
Pa finalisa, Sra. Geerman a gradeci tur hende cu a contribui na e evento aki y a subraya e importancia di sosten di comunidad pa cu exito di e proyecto aki.
Kiwanis Club of Palm Beach a reparti 17 Child Car Seat
ORANJESTAD – Diasabra 28 di september, 2024, Kiwanis Club of Palm Beach conhuntamente cu Wit Gele Kruis a reparti 17 Child Car Seats na famianan den necesidad. Ta bon pa menciona cu ta di 22 aña cu ta yuda famianan yega na un Child Car Seat pa seguridad di nos muchanan riba careteranan di Aruba.
Adrienne Tromp ta oficialmente gradua como prome Openbaar Apotheker studia na Aruba
ORANJESTAD - Apotheker Adrienne Tromp a gradua oficialmente como prome openbaar apotheker cu a haci su specialisacion akinan na Aruba. Botica di Servicio actualmente tin tres openbaar apothekers (cual ta inclui Adrienne Tromp, Anoeska Wever y Dasha Dubero hunto cu nan otro apothekers) mustrando cu Botica di Servicio ta sigui traha riba brinda e miho calidad di servicio.
Trahadonan di Aruba Bank y famia a participa den “Coastal Cleanup Day”
ORANJESTAD - Aruba Bank su trahadonan y famia a yuda limpia costa na Rincon Beach durante e “Coastal Cleanup Day” organiza pa Banco Central di Aruba. E esfuerzo di cada participante a haci un gran diferencia pa proteha nos dushi isla. Hunto, nos ta tene Aruba limpi pa e futuro generacionnan, y nos por sigui disfruta di nos medio ambiente limpi y sostenibel pa hopi aña mas.
Fundacion Cultuurfonds Caribisch Gebied (CCG) a celebra 70 Aña
ORANJESTAD – E Fundacion Cultuurfonds Caribisch Gebied (CCG) a celebra cu orguyo su 70 aña, marcando otro decada di contribucion cultural y desaroyo den nos comunidad. Un di e momentonan mas emocional tabata e despedida di Lourdes Croes, cu a dedica 30 aña di servicio voluntario na e fundacion. Su compromiso incansabel y pasion pa preservacion cultural a laga un marca inolvidabel riba e organizacion y riba e comunidad en general.
Grupo di prensa local a celebra ‘Dia di Prensa’ cu Hilton Aruba Caribbean Resort & Casino
ORANJESTAD – Un grupo di prensa local di Aruba diaranson a keda entreteni pa e grupo gerencial di Hilton Aruba Caribbean Resort & Casino, den cuadro di e reciente Dia di Prensa cu tabata 1 di September 2024. A opta pa haci e celebracion aki mas laat, debi na e agenda ocupa di prensa. Cu asistencia di gerente di mercadeo Joanne Dirksz, e grupo di prensa a experencia algo diferente unda cu nan por a pinta, sip, y come un cuminda prepara pa e hotel. Riba beach, e periodistanan invita tabatin como tarea pa reproduci un cuadro cu mester a representa tres boto di bela, laman y solo di Aruba. Cu guia di artista Elisa Lejuez, e periodistanan a bira artistanan un rato produciendo cada uno nan respectivo obra. Despues e hotel a ofrece e periodistanan un cena riba beach tambe, cu un variedad di posibilidad. Un momento sigur ameno durante cual e periodistanan por a relaha y disfruta di algo differente, cortesia di e hotel.
Women’s Club of Aruba ta celebra su di 90 aniversario
ORANJESTAD - E aña aki, Women’s Club of Aruba (WCA) cu orguyo ta celebra su di 90 aniversario – un logro increibel cu ta papia di decadanan di dedicacion, resistencia, y un compromiso continuo pa sirbi nos comunidad. Funda riba 17 di september 1934, WCA a crece bira un organisacion di vital importancia, trahando incansablemente pa haci e diferencia door di boluntarismo y traha na interes di Aruba.
Follow NoticiaCla
