Problema di presion di aire na Delta Air Lines: pasaheronan ta sangra for di nanishi y orea

SALT LAKE CITY – Riba un vuelo di Delta Air Lines for di Salt Lake City rumbo pa Portland na costa west di Merca, tabata tin problema cu e presion di aire diadomingo ultimo. Asina e aeroliña a confirma diaranson. Algun pasahero a cuminsa sangra for di nan nanishi y orea, medionan Mericano a informa. Tur hunto tin por lo menos diez lesion. Despues di e incidente, e buelo a wordo desvia mesora bek pa Salt Lake City, caminda e heridonan a ricibi tratamento. Nan por a sigui nan biahe riba un otro avion. “Tabata manera un hende tabata hinca algo den mi oreanan. E tabata zona manera mi orea tabata bula. Ora mi a mishi cun’e, sanger a sali,” un victima a bisa e canal Mericano CNN.

DISCULPA

“Nos ta pidi disculpa sinceramente,” un comunikado di prensa di Delta Air Lines a bisa, sin duna detaye riba e causa di e incidente. Tecniconan a restora presion di aire na e avion. El a wordo uza atrobe dialuna, sin ningun problema. Autoridad Mericano di aviacion FAA ta bisa cu nan lo investiga e asunto.