Parlamento di St. Maarten ta sinta 20 september awor

W’STAD/PHILIPSBURG - Parlamento di St. Maarten den un reunion di djaluna 16 sèptèmber a verifiká kredensial di miembronan nobo ku lo tuma asiento den parlamento. Esaki a base di elekshon parlamentario ku a tuma lugá dia 19 ougùstùs último. E parlamento nobo di St. Maarten lo sinta dia 20 sèptèmber awor despues ku nan kaba di hura.

Presidente di Konseho Supremo Elektoral a manda un karta pa parlamento di St. Maarten fechá 16 sèptèmber informando ku Egbert Doran, Ardwell Irion i Darryl York (tur di National Alliance), Luc Mercelina, Sjamira Roseburg i Richinel Brug (tur di URSM), Sarah Wescot-Williams, Grisha Heiliger-Marten, i Viren Kotai (tur di DP), Melissa Gumbs i Ludmila de Weever (ámbos di PFP), Omar Ottley i Francisco Lacroes (ámbos di UP), Franklin Meyers (SAM) i Lyndon Lewis (NOW) a aseptá nan posishon komo miembronan nobo di parlamento.

Tambe parlamento a risibí e kredensialnan di e miembronan nobo. Presidente di parlamento, Wescot-Williams a nombra un komishon ku ta konsistí di Silveria Jacobs, Omar Ottley i Richinel Brug pa kontrolá e kredensialnan i e komishon a konstatá ku tur e dokumentonan ta na òrdu. Despues presidente di parlamento a disolvé e komishon atrobe. Seguidamente parlamento a bai di akuerdo ku e kredensialnan i Wescot-Williams a bisa ku lo informá Konseho Supremo Elektoral i gobernadó Ajamu Baly di e desishon di parlamento. NOTA: Texto ta scirbi den Papiamento fonetico di Corsou.