Gerlien Croes a lansa su propio partido 'FUTURO'

ORANJESTAD – Despues di hopi anticipacion, y 7 luna despues di a inscribe e partido oficialmente, politico Gerlien Croes a lansa su partido propio FUTURO, cu lo participa na e proximo eleccion Parlamentario na december proximo. E lansamento a tuma lugar na Casibari Rock Formations mei mei di famianan, fanatico y posibel futuro miembronan di e partido. Gerlien Croes mes a tene un discurso cortico, pa yama tur hende bon bini, y a sigura cu e ta traha manera e nomber di partido ta bisa, futuro di nos muchanan, y drecha tur loke ta malo. 

CARANAN CONOCI

Loke a hala hopi atencion for di algun dia caba, pero cu a keda confirma diadomingo anochi, ta e caranan cu a asocia publicamente cu e partido y Gerlien, manera ex miembro di partido AVP Muzanine Wever, yiu di palanca y miembro di partido berde Chris Dammers esta Khamila Dammers, y ex minister pa AVP Angel Bermudez cu a aparece riba e video di introduction. Ademas por a nota varios persona cu tabata cu e partido berde y tambe geel, cu tambe a ‘bula cura’ y a uni cu Gerlien den su hornada nobo. E mencion di e caranan aki ta importante pasobra nan ta(bata) palanca fuerte di e partido berde, sigur un Alice van Romondt cu tabata secretario di conseho di minister pa gabinete Henny Eman den pasado. Y Wever tabata riba e ultimo lista di e partido berde. Esaki ta nifica cu un grupo basta interesante a ‘separa’ di e partido berde. 

CONTENIDO

Mientras cu e partido a keda lansa, no ta conoci ainda ken ta activamente riba e lista, y tin cu warda mas bien te dia 18 di October proximo, ora cu tin entrega di lista e momento ey. Pero mirando cierto caranan cu a aparece diadomingo anochi, por tin un idea ken y ken por ta riba e lista y ken lo tey pero ‘tras di cortina’’. 

AVP 2.0.

MEs momento tin hopi cu ya a cuminsa tilda e partido di ta un ‘verlengstuk’ di partido berde, y cu Gerlien Croes no a los completamente di e partido berde, pero cu asina, e ta logra mantene e grupo aki di ex AVP, y posiblemente, forma un gobierno cu AVP bek, si pueblo dune suficiente confiansa dia 6 di December proximo. Informacion cu Noticiacla tin, ta cu ta keda na miembronan di e partido pa dicidi finalmente, si dado caso tin un escogencia pa haci, ora cu ta asina leu, kico e siguiente paso ta pa tuma, y cu Gerlien lo honra e decision tuma pa e partido completo, cua cu e decision ey por ta. Noticiacla manera a haci tur otro partido nobo, ta desea Gerlien Croes y su partido propio, FUTURO, tur cos bon pa e proximo eleccion.