Kenna Hernandez ta presenta su buki debut ‘Los Diez Encantos’ na Hulanda
NIJMEGEN – Kenna Hernandez, un escritora den su comienso, ta contento pa anuncia e lansamento di su prome buki Los Diez Encantos, un historia cu ta combina eventonan real cu elementonan di ficcion pa atrae y entretene e lesado.
E buki a ser publica originalmente na Malaga, Spaña, y ta wordo lansa awor na Hulanda, caminda e ta biba actualmente. Los Diez Encantos ta un gran logro pa Kenna den su caminda como autor. E ta un studiante den su ultimo aña na Hogeschool van Arnhem en Nijmegen (HAN), caminda e ta studia Ingles. Pa despues e sigui su master den Literatura.
E lansamento priva di su buki lo tuma luga na Nijmegen, den un ambiente intimo cu amigonan y conocinan cerca pa celebra e realisacion di su gran soño. E historia di Los Diez Encantos ta un mescla di realidad y ficcion, inspira pa experiencianan personal, pero crea pa toca un publico amplio.
E ta considera su buki como un manera pa conecta cu otro hende, specialmente cu esnan cu ta aprecia historia cu ta refleha tanto e reto, como un triunfo di bida. Aunke
Los Diez Encantos ta su prome buki publica, no ta su prome obra skribi. El a skibi anterior buki den Papiamento y Ingles. Su siguiente meta ta pa publica su novela na Papiamento, cu ta contene un historia romantico historico di siglo anterior.
“Ora mi tabata na scol, mi tabata lesa hopi buki na Ingles, Hulandes, Spaño y Papiamento. Na Aruba nos tin e bendicion di domina varios idioma y expande nos fuente literario ta un manera fantastico pa amplia nos conosemento y cultura”, e ta bisa.
Kenna su soño ta pa inspira hubentudnan pa lesa mas y amplia nan horizonte via literatura. Pa pone historia disponibel den varios idioma, e ta spera di contribui na fuente educativo cu ta conecta cu un audiencia diversifica y multilengual.
Kiwanis Club of Palm Beach a reparti 17 Child Car Seat
ORANJESTAD – Diasabra 28 di september, 2024, Kiwanis Club of Palm Beach conhuntamente cu Wit Gele Kruis a reparti 17 Child Car Seats na famianan den necesidad. Ta bon pa menciona cu ta di 22 aña cu ta yuda famianan yega na un Child Car Seat pa seguridad di nos muchanan riba careteranan di Aruba.
Adrienne Tromp ta oficialmente gradua como prome Openbaar Apotheker studia na Aruba
ORANJESTAD - Apotheker Adrienne Tromp a gradua oficialmente como prome openbaar apotheker cu a haci su specialisacion akinan na Aruba. Botica di Servicio actualmente tin tres openbaar apothekers (cual ta inclui Adrienne Tromp, Anoeska Wever y Dasha Dubero hunto cu nan otro apothekers) mustrando cu Botica di Servicio ta sigui traha riba brinda e miho calidad di servicio.
Women’s Club of Aruba a lansa iniciativa "90 Mata pa 90 Aña"
ORANJESTAD - Recientemente Women’s Club of Aruba (WCA) a inicia nan proyecto “90 Mata pa 90 Aña” en conexion cu celebracion di su 90 aniversario sirbiendo nos isla. Cu un plantamento simbolico di e prome mata na Biblioteca Nacional Aruba – Arubiana/ Caribiana den Bachstraat kier enfoca riba mehoracion di Medio Ambiente na Aruba y pa laga un herencia duradero pa e generacion di futuro.
Trahadonan di Aruba Bank y famia a participa den “Coastal Cleanup Day”
ORANJESTAD - Aruba Bank su trahadonan y famia a yuda limpia costa na Rincon Beach durante e “Coastal Cleanup Day” organiza pa Banco Central di Aruba. E esfuerzo di cada participante a haci un gran diferencia pa proteha nos dushi isla. Hunto, nos ta tene Aruba limpi pa e futuro generacionnan, y nos por sigui disfruta di nos medio ambiente limpi y sostenibel pa hopi aña mas.
Fundacion Cultuurfonds Caribisch Gebied (CCG) a celebra 70 Aña
ORANJESTAD – E Fundacion Cultuurfonds Caribisch Gebied (CCG) a celebra cu orguyo su 70 aña, marcando otro decada di contribucion cultural y desaroyo den nos comunidad. Un di e momentonan mas emocional tabata e despedida di Lourdes Croes, cu a dedica 30 aña di servicio voluntario na e fundacion. Su compromiso incansabel y pasion pa preservacion cultural a laga un marca inolvidabel riba e organizacion y riba e comunidad en general.
Grupo di prensa local a celebra ‘Dia di Prensa’ cu Hilton Aruba Caribbean Resort & Casino
ORANJESTAD – Un grupo di prensa local di Aruba diaranson a keda entreteni pa e grupo gerencial di Hilton Aruba Caribbean Resort & Casino, den cuadro di e reciente Dia di Prensa cu tabata 1 di September 2024. A opta pa haci e celebracion aki mas laat, debi na e agenda ocupa di prensa. Cu asistencia di gerente di mercadeo Joanne Dirksz, e grupo di prensa a experencia algo diferente unda cu nan por a pinta, sip, y come un cuminda prepara pa e hotel. Riba beach, e periodistanan invita tabatin como tarea pa reproduci un cuadro cu mester a representa tres boto di bela, laman y solo di Aruba. Cu guia di artista Elisa Lejuez, e periodistanan a bira artistanan un rato produciendo cada uno nan respectivo obra. Despues e hotel a ofrece e periodistanan un cena riba beach tambe, cu un variedad di posibilidad. Un momento sigur ameno durante cual e periodistanan por a relaha y disfruta di algo differente, cortesia di e hotel.
Follow NoticiaCla
