• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Analisis: Hopi atrobe den politica

Hopi atrobe den politica 

Aruba ta bay urna electoral atrobe dentro di 3 luna di tempo. Y atrobe un gobierno di coalicion no ta logra caba su termino regular di 4 aña di gobernacion. Y atrobe, pa un motibo cu hopi ta considera y cuestiona como uno cu no ta(bata) necesario. Y awor tin un eleccion stipula den un periodo na caminda pa fin di aña cu pa hopi, nan cabez lo ta den tur cos menos pa un eleccion parlamentario. Y pa comercio pio, unda cu un eleccion Parlamentario net prome cu un ‘temporada halto’ unda cu ta conoci cu den tempo ey tur cos ta practicamente paraliza pa motibo di incertidumbre, no ta nada positivo. Pero enfin. E ta un hecho cu tin eleccion y nos tin cu biba cu ne. 

MEP ta sigura nos cu e motibo di e ruptura, ta pasobra RAIZ ‘a kibra e acuerdo di gobernacion, door di a viola esaki cu e asunto di nombracion di un presidente di Parlamento diferente di loke e partido a postula. RAIZ den su defensa ta sigura cu ‘no a kibra nada’, pasobra ningun momento RAIZ lo a exigi pa nan haya e posicion, sino ta ‘djis e persona di MEP’ mester a cambia y nan lo ta OK cu ne.Mientrastantanto, awor ta resulta cu den e carta di MEP pa RAIZ,- cu a bira publico diamars -, MEP ta recorda RAIZ cu den pasado MEP tambe a protesta e tempo ey contra un candidato cu RAIZ mester a apunta (minister plenipotenciario pa Washington den persona di abogado Ronald Wix) pero cu RAIZ ‘tambe’ a resisti. Esaki a zona como si fuera MEP ta  recordando RAIZ cu ‘Boso tambe a haci mescos, of bo a lubida?’ Politicamente, MEP a faya den sentido cu e la ‘gamble’ cu RAIZ lo a ‘recapacita’ y ‘back down’ na final, manera cu minister president mes ta apela na RAIZ  den e carta cu a bira publico diamars (awe). RAIZ sinembargo no a back down y nos tur sa e resultado awor. E realidad ta tambe cu MEP a dicidi diadomingo anochi cu ta Edgard Vrolijk mes ta keda e candidato pa presidencia, y RAIZ a anuncia mes momento cu nan tambe ta keda para riba nan punto. Ambos kier a mustra determina y fuerte pa nan siguidornan. Pero e forma con MEP a anda cu e asunto, ta manera cu na spaño ta bisa, el tiro se le salio por la c…. E gamble a sali MEP caro, unda cu Vrolijk mester a wak su funcion bay den huma, publicamente, LIVE y mira con e la keda rechasa, aunke ‘tur e trabou bon cu e ta bisa cu e la haci’. No a keda MEP nada otro di benta gobierno abou, cu politicamente ta duna nan e ‘edge’, e ventaha politico awor, aunke esun cu a cuminsa cu e proceso cu a conduci na e caida, tabata RAIZ door di publicamente protesta contra Vrolijk. E berdad ta si, cu asabiendas di e informacion di RAIZ diadomingo anochi, MEP lo mester a ‘pull the plug’ diadomingo anochi mes y no warda riba e ‘boluntad’ di RAIZ su manese. Pero ta parse cu RAIZ tambe a ‘gamble’ cu MEP lo a ‘back down’ y cambia Vrolijk pa un otro persona na ultimo ora. De echo, saliendo for di e reunion di partijraad di MEP diadomingo anochi, esey tabata e impresion crea, scuchando Vrolijk splica e proceso di e reunion. Enfin, mientras cu MEP tin e ‘ventaha’ pa a benta gobierno abou, e no tin mucho forza, pasobra hopi ta considera cu e motibo di e bentamento abou, no tabata uno necesario. Di otro banda, MEP ta usa ‘kiebro di confiansa’ y esaki ta keda debatible y ta dun’e mas forza. RAIZ tabatin varios momento cu e por a ‘benta e gobierno abou’ pero no a hacie pa ‘bienestar general’. Pero RAIZ ta lubida cu den politica no tin logica. Y un hende cu kier haci lo corecto den politica, ta sea naïve of tin un bril di palo bisti. E loke a sosode, mester bisa tambe, no ta nada straño den politica riba su mes. Nos por corda bon cu e palabra "postema" a yega di basha gobierno abou, tampoco paun issue serio. Den nos analysis di algun tempo atras, nos a bisa tambe cu yegando mas cerca di e fecha di eleccion, e partidonan ta bai haya mas necesidad di profila nan mes mas fuerte contra otro, pasobra nan lo no por bai den un campaña den cua nan lo gaba otro. Peor esun partido chikito cu tabata hayando demasiado "color" di e partido grandi. E pregunta ta berdad pakico Mep no a trata di soluciona e issue aki prome y no a pidi su presidente di Parlamento ta mas "coulant" pa cu nan "junior partner" manera ex politico Tico Croes a yega di fama un partner den coalicion. Por ta cu Mep kier a "drijf e asunto op de spits toe" esta bringa e cos aki te final y tira mas geel den shinishi di Raiz y alabes pone e clausula di "sino fono"? Y RAIZ por ta kier a "flirt" cu partidonan di oposicion pa haya alomenos algo di simpatia? Pasobra aunke cu RAIZ a rechasa rotundamente cu nan a traha ‘complot’ of deal cu oposicion, esaki no ta completamente convincente den politica. Partidonan politico no sa haci cos semper ‘di buena fe’, of algo sin sa sigur cu e ta logra y den e caso aki lo por a laga algo ‘los’ di nan intencion. Of, ta hopi suerte mes RAIZ mester ta tin cu nan a haya henter oposicion ‘zomaar’ na nan fabor, sin ningun palabracion of ‘deal’. Nos lo duna RAIZ e beneficio di duda, pero.. ‘politica ta cruel’.  Como quiera que sea MEP (of RAIZ, depende con bo wak e) ta bai den historia como e partido cu a baha gobierno de facto, y awor ta na e votadornan pa huzga e acto aki como uno di principio of di oportunismo. Dia 6 di December nos lo sa.  Y pa MEP nos lo haya sa cu si nan telraam no resulta e mesun cu defunto Juancho Evertsz a yega di reken den cua 9-2=0.