Awe ta firma anexo riba programa di gobernashon gabinete Pisas II

WILLEMSTAD - Partidonan MFK, KEM i miembro independiente di parlamento Zita Jesus-Leito ta firma awe 9 sèptèmber (“addendum”) riba e programa di gobernashon di gabinete Pisas II. E akto di firmamentu ta tuma lugá na Curaçao Marriott Beach Resort i ta kuminsá 4 or di atardi. Den e anekso aki ta pone e kondishonnan di KEM i Jesus-Leito pa nan duna nan sosten na e gabinete.

Partidonan a logra den nan intenshon ku e anekso ta keda kla promé ku apertura di aña parlamentario nobo ku lo ta djamars 10 sèptèmber. Ta for di 26 i 27 di ougùstùs KEM i Jesus-Leito a hiba e promé deliberashonnan separá ku e tim negoshadó di partido MFK pa yega na e anekso. 

Nan a entregá nan puntonan ku e ke mira atenshon pe den e akuerdo di gobernashon i djárason 4 sèptèmber último a repasá e puntonan i formulashon di e teksto di e anekso. Tabata gobernadó Lucille George-Wout despues di a risibí e kartanan di sosten di KEM i Jesus-leito pa gabinete Pisas II a indiká ku partidonan mester traha riba un anekso.

Entretantu nòmbernan di kandidatonan pa minister di KEM i Jesus-Leito a bai aden kaba pa e proseso di “screening”. Tambe nòmber di kolaboradónan pa e ministernan ta konosí.

Partidonan te ainda ta tene e nòmbernan sekreto. Un nòmber di kolaboradó sinembargo ta konosí kaba ku ta Jason Fullinck. E ta nombra kaba komo hefe di gabinete di minister di Desaroyo Sosial, Labor i Bienestar pa partido KEM

Di Jesus-Leito por komprondé ku den e kolaboradónan di minister di Desaroyo Ekonómiko tin entre otro e personanan di fam Sluis i Jamanika. Jesus-Leito mes a indiká ku e tin un kandidato dispuesto pa yena e funshon di minister, pero e no a divulgá ta ken esaki ta.

Relashoná ku sosten di otro miembro independiente di parlamento, Corine Djaoen-Genaro pa gabinete Pisas II no tin muchu konosí. For di pasionan di parlamento EXTRA ta komprondé ku pronto lo por tin un anunsio pa e sosten aki, sinembargo no tin konfirmashon di esaki ainda.

Tabata un karta fechá 21 ougùstùs i firmá pa tur 9 miembro di parlamento pa MFK ku a lidia na e kambio den e konstelashon di e koalishon ku ta sostené gabinete Pisas II. Den e karta e frakshon di MFK ta bisa ku mirando e akontesimentunan kaminda parlamentario Sheldry Osepa (PNP) a yama MFK partido inkonfiabel i parlamentario Gwendell Mercelina (PNP) ta tilda MFK di tur sorto di kos, frakshon di MFK no ta dispuesto mas pa sigui traha den koalishon ku e 2 parlamentarionan pa PNP. Lider polítiko di PNP, Ruthmilda Larmonie-Cecilia a haña e karta aki djárason 2 ougùstùs for di man di promé minister Gilmar ‘Pik’ Pisas (MFK).

Esaki tabata motibu pa Larmonie-Cecilia a sali mesora for di e reunion di Konseho di Minister ku tabata andando i alabes indikando ku PNP lo no por sigui partisipá den gobièrnu bou di e kondishonnan aki. E lider polítiko di PNP a yama un reunion urgente na Kas di Pueblo riba Winston Churchillweg ku ministernan, miembronan di parlamento, direktiva i sobrá prominentenan di partido.

Den e reunion aki e desishon definitivo a kai ku e ministernan di PNP lo bai entregá nan retiro na gobernadó a base di e último desaroyonan aki den seno di koalishon. Gobernadó George-Wout a aseptá retiro di ministernan di PNP, esta Larmonie-Cecilia, Ornelio ‘Kid’ Martina i Ruisandro Cijntje.

Tambe el a hiba deliberashon ku promé minister Gilmar ‘Pik’ Pisas ku a informá ku e tin sosten di partido KEM i miembro independiente di parlamento, Zita Jesus-Leito ta sostené gabinete Pisas II. NOTA: Texto ta scirbi den Papiamento fonetico di Corsou.