- AWSS: Medio mei por sinti e efecto nan positivo di e cambio na Bubali su planta
- Caso di Mike de Meza contra DIMP ta fin di mei awor!
- Na Corsou, Gobernador a huramenta Parlamento nobo
- Premier Schoof impresiona cu empresario Kock na Aruba
- Eman: Autosuficiencia y resiliencia Arubano a sobresali durante bishita di premier Dick Schoof
Awe ta firma anexo riba programa di gobernashon gabinete Pisas II
WILLEMSTAD - Partidonan MFK, KEM i miembro independiente di parlamento Zita Jesus-Leito ta firma awe 9 sèptèmber (“addendum”) riba e programa di gobernashon di gabinete Pisas II. E akto di firmamentu ta tuma lugá na Curaçao Marriott Beach Resort i ta kuminsá 4 or di atardi. Den e anekso aki ta pone e kondishonnan di KEM i Jesus-Leito pa nan duna nan sosten na e gabinete.
Partidonan a logra den nan intenshon ku e anekso ta keda kla promé ku apertura di aña parlamentario nobo ku lo ta djamars 10 sèptèmber. Ta for di 26 i 27 di ougùstùs KEM i Jesus-Leito a hiba e promé deliberashonnan separá ku e tim negoshadó di partido MFK pa yega na e anekso.
Nan a entregá nan puntonan ku e ke mira atenshon pe den e akuerdo di gobernashon i djárason 4 sèptèmber último a repasá e puntonan i formulashon di e teksto di e anekso. Tabata gobernadó Lucille George-Wout despues di a risibí e kartanan di sosten di KEM i Jesus-leito pa gabinete Pisas II a indiká ku partidonan mester traha riba un anekso.
Entretantu nòmbernan di kandidatonan pa minister di KEM i Jesus-Leito a bai aden kaba pa e proseso di “screening”. Tambe nòmber di kolaboradónan pa e ministernan ta konosí.
Partidonan te ainda ta tene e nòmbernan sekreto. Un nòmber di kolaboradó sinembargo ta konosí kaba ku ta Jason Fullinck. E ta nombra kaba komo hefe di gabinete di minister di Desaroyo Sosial, Labor i Bienestar pa partido KEM
Di Jesus-Leito por komprondé ku den e kolaboradónan di minister di Desaroyo Ekonómiko tin entre otro e personanan di fam Sluis i Jamanika. Jesus-Leito mes a indiká ku e tin un kandidato dispuesto pa yena e funshon di minister, pero e no a divulgá ta ken esaki ta.
Relashoná ku sosten di otro miembro independiente di parlamento, Corine Djaoen-Genaro pa gabinete Pisas II no tin muchu konosí. For di pasionan di parlamento EXTRA ta komprondé ku pronto lo por tin un anunsio pa e sosten aki, sinembargo no tin konfirmashon di esaki ainda.
Tabata un karta fechá 21 ougùstùs i firmá pa tur 9 miembro di parlamento pa MFK ku a lidia na e kambio den e konstelashon di e koalishon ku ta sostené gabinete Pisas II. Den e karta e frakshon di MFK ta bisa ku mirando e akontesimentunan kaminda parlamentario Sheldry Osepa (PNP) a yama MFK partido inkonfiabel i parlamentario Gwendell Mercelina (PNP) ta tilda MFK di tur sorto di kos, frakshon di MFK no ta dispuesto mas pa sigui traha den koalishon ku e 2 parlamentarionan pa PNP. Lider polítiko di PNP, Ruthmilda Larmonie-Cecilia a haña e karta aki djárason 2 ougùstùs for di man di promé minister Gilmar ‘Pik’ Pisas (MFK).
Esaki tabata motibu pa Larmonie-Cecilia a sali mesora for di e reunion di Konseho di Minister ku tabata andando i alabes indikando ku PNP lo no por sigui partisipá den gobièrnu bou di e kondishonnan aki. E lider polítiko di PNP a yama un reunion urgente na Kas di Pueblo riba Winston Churchillweg ku ministernan, miembronan di parlamento, direktiva i sobrá prominentenan di partido.
Den e reunion aki e desishon definitivo a kai ku e ministernan di PNP lo bai entregá nan retiro na gobernadó a base di e último desaroyonan aki den seno di koalishon. Gobernadó George-Wout a aseptá retiro di ministernan di PNP, esta Larmonie-Cecilia, Ornelio ‘Kid’ Martina i Ruisandro Cijntje.
Tambe el a hiba deliberashon ku promé minister Gilmar ‘Pik’ Pisas ku a informá ku e tin sosten di partido KEM i miembro independiente di parlamento, Zita Jesus-Leito ta sostené gabinete Pisas II. NOTA: Texto ta scirbi den Papiamento fonetico di Corsou.
Na Corsou, Gobernador a huramenta Parlamento nobo
WILLEMSTAD.- Na okashon di huramentashon di parlamentarionan nobo, gobernadó sra. Lucille George-Wout a hiba palabra na e 21 parlamentarionan, kaminda a pidi nan pa salbaguardiá nos estado di derecho demokrátiko. Na e elekshon dia 21 di mart, pueblo di Kòrsou a papia palabra kla. Komo miembronan di Staten, nan ta asumí nan funshon den tempu kompliká i turbulento. Nos isla ta fuertemente konektá ku e mundu rònt di nos. I susesonan internashonal ta di gran impakto riba nos seguridat, i tambe riba relashonnan sosial. Skohe pa sirbi interes i bienestar públiko, den un époka manera esaki, lokual ku kada un di bosnan ta hasi, ta demostrá kurashí i un sentido di responsabilidat enorme. E desishon aki meresé tur hende su respèt i apresio.
Pastor Curtis Meris, canciyer di Obispado: Papa Leo XIV conoce e realidad di rond mundo
WILLEMSTAD - Ayera huma blanku a sali for di e chimenea na Vatikano anunsiando ku kardinal Robert Prevost ta bira e di 267 Papa na kabes di Iglesia Katóliko. E lo funshoná bou di Papa Leo XIV (14). E di 267 pontífise di misa katóliko a nase na Chicago den 1955, pero tambe tin nashonalidat peruano, kaminda el a traha komo misionero i arsobispu emérito di Chiclayo.
Na Corsou ta sugeri pa traha camber pa Parlamentarionan por drumi!
WILLEMSTAD - Durante di su trabounan e komishon temporal edifisio di parlamento a risibí remarkenan di parlamentarionan pa pensa riba un espasio den e edifisio di parlamento pa parlamentarionan i personal di griffie por sosegá nan kurpa. Asina presidente di e komishon temporal, Juniel Carolina (MFK), ta bisa. E komishon a haña e tarea pa presentá ku alternativanan kon por pone tur operashon di parlamento bou di un solo dak. Aktualmente parlamento i griffie ta usa 4 diferente edifisio.
Segun Google Flights 2025, Corsou ta destinacion # 1 pa Mericano
MIAMI - Di acuerdo cu e portal Google Flights’ 2025 Summer Travel Trends, Corsu ta e destinacion internacional #1 di tendencia pa biaheronan mericano e zomer aki. Esei no ta djis hype segun e portal ya cu e isla aki ta kibrando recordnan, agrega buelonan nobo, revela resortnan nobo nobo,y hala atencion serio di biaheronan cu kier algo mas cu djis un otro escapada na playa. Segun e portal, Aruba ta figura te na number 10.
American Airlines ta añadi extra buelo pa Corsou na december
CHICAGO - American Airlines a anuncia cu e ta agrega mas ruta di weer cayente for di Aeropuerto Internacional di Chicago O’Hare (ORD) pa e temporada di biahe di winter benidero, te na e punto cu e ta redoblando su capacidad pa destinacionnan cayente. American ta agrega cinco destinacion nobo na e 11 cu e ta sirbi actualmente den Caribe, Mexico y Centro America for di O’Hare: Curaçao (CUR); St. Croix (STX); St. Maarten (SXM); Ciudad di Guatemala (GUA); i San José, Costa Rica (SJO).
Na Corsou, dama ta perde bida den trafico
WILLEMSTAD - Corsou ta bolbe lamentá un morto den tráfiko. Tabata den oranan di anochi lat ku un aksidente grave a tuma lugá riba kaminda di Westpunt na altura di Daniel. Sigun informashon ku a yega na redakshon di Extra, ta indiká ku un vehíkulo marka Kia Sportage koló pretu tabata direkshon pariba i pa motibunan deskonosí e shofùr a baha for di kaminda ku su vehíkulo na banda drechi di kaminda i a bai dal kontra di un palu.
Follow NoticiaCla
