Gobierno y fundacion di Colombia den impasse pasobra gobierno kier trece clientenan bek Aruba

ORANJESTAD – Gobierno di Aruba recientemente a dicidi pa trece e clientenan pa tratamento psiciatrico actualmente na Colombia, bek.  “Na bienestar di nos clientenan, mi persona, atraves di conseho cu mi a ricibi di "indicatiecommissie", e mesun commissie cu na prome instancia a conseha pa manda nos clientenan "Corporacion con Animo", a dicidi di trece nan bek y sigui duna e cuido na Aruba of Corsow” tabata e reaccion breve di minister encarga cu asuntonan social Rocco Tjon na Noticiacla.  E mandatario tabata breve como cu e caso ta den corte aworaki. “E commissie ta consisti di profesionalnan di "basis GGZ" y "specialisische GGZ". Y pa keda cliente tin un plan di cuido traha”.

ORDEMAATREGEL RECHASA

Segun e mandatario, e ordemaatregel (medida di orden di huez pa para cualkier accion di gobierno temporalmente) cu Corporacion con Animo a puntra Corte impone a wordo rechaza pa huez” e mandatario a bisa. “Y aworaki nos ta en espera di un fecha pa e caso wordo trata” e minister a finalisa bisando.

E CASO 

Ta conoci cu e fundacion a hiba gobierno corte pa evita cu e pashentnan tin cu bolbe Aruba y a sigura cu e mas di 10 pashent ta hayando tratamento adecuado na e finca na Colombia. Y nan a busca asistencia di e abogado local Doris Canwood. Segun e matutino Diario, tin un fecha stipula di dia 6 di September 2024 (diabierna awor) cu e pashentnan mester ta bek na Aruba. Segun e relato den e matutino, tin pashentnan cu a nenga di bolbe.