Molina(MEP): Actitud di arogancia y falta di vision di Ursell Arends ta pompe

ORANJESTAD – Parlamentario di parlamentario di partido MEP Alvin Molina a continua cu su atakenan publico contra nada menos cu un minister cu ta forma parti di e coalicion MEP-RAIZ, esta Ursell Arends (RAIZ). Segun Molina, minister di integridad no ta mucho integro y cu “ E prome persona cu e mester condena ta su mes”.

OBSESIONA CU INTEGRIDAD

Segun Molina, “esaki ta pasa ora bo ta asina “obsessed” cu integridad, cu bo mes ta lubida di ta integro”. E resultado segun Molina, ta un comunicado yena cu manipulacion, mentira y hasta insulto. “Ta cosnan cu lastimamente sa pasa den politica, pero sigur hopi mahos pa un persona cu a nombra su mes e “guru” di integridad”.  Segun Molina, djis pa menciona algun: “E minister a expresa cu ami a bisa cu integridad no ta un prioridad pa mi. Esey ta un mentira. Loke cu mi a splica ta cu mester pone atencion na un gobernacion integro, bringa contra corupcion, pero cu e meta pa optimalisa e servicio cu ta wordo duna na pueblo. Un servicio cu ta percura pa e necesidadnan basico di nos ciudadanonan, por ehempel e cuminda riba mesa, dak riba nan cabes, siguridad riba caya, cuido medico y enseñansa”. Tur otro topico, segun Molina, por ehempel economia, finansa publico, turismo, colaboracion, e procesonan vigente, “good governance” y integridad mester contribui na e necesidadnan basico di pueblo y di e forma aki TA prioridad.

CUERPO POLICIAL

” Hasta nos minister ta insinua cu nos cuerpo policial no ta educa su miembronan suficiente riba e topico y ta mal uza e lema di KPA pa su manipulacion politico. Minister, kisas bo a yega di atende un “workshop” di integridad. Mi ta sigur cu mi coleganan di KPA ta dispuesto pa dunabo un “refreshment course” y un “upgrade”, “make sure” bo let op bon e biaha aki” Molina a sigui bisa.

GRITA INTEGRIDAD

Segun Molina, integridad no ta solamente grita con integro bo ta. “Minister por pone un tattoo di integridad mes riba su frenta, pero si den tur bo maneho ta keda imposibel pa demostra con bo ta contribuyendo na e necesidadnan basico di bo pueblo, e ora ey ta ovio cu eigenlijk bo no ta compronde e importancia ni e luga di integridad. Hopi jammer eigenlijk, un guy asina nechi, ta bisti bon, cabey semper strak pela, cutis bunita broncea. Ta su actitud di arogancia y falta di vision ta pompe” Molina ta finalisa bisando.