Analysis: ‘Guera’ entre Molina y Arends ta pa ‘consumo publico’ of algo mas serio?

E ‘supuesto’ guera entre parlamentario di MEP Alvin Molina y minister di RAIZ Ursell Arends a continua e siman aki. Despues cu e parlamentario di MEP a lansa e prome atake directo contra minister di e coalicion RAIZ, e siman aki e la continua cu e atake. Y esaki ta despues cu e minister en cuestion mes a reacciona publicamente contra e prome declaracion di e parlamentario. E pregunta ta, con mester interpreta e ‘bay bin’ aki den prensa entre e dos personanan aki. Experiencia ta bisa cu esaki ta mas bien un ventilacion di ‘frustracion’ y no por cataloga esaki necesariamente como un ‘guera’ real entre e dos personanan aki. Algun lo bisa cu mester por, cu un parlamentario por bisa un minister ‘algun cos’ sin cu mesora mester interpreta esaki como un ‘crisis’ politico entre partnernan di coalicion. Di otro banda, e ‘bay bin’ entre e dos personanan aki, por haya un bida riba su mes, te ora cu esaki rementa den nan cara. Y si, nos, prensa hopi biaha ta e vehiculo cu ta wordo usa pa yuda 'fuel' e problema. Pero, na defensa, ora cu dos politico 'prominente;' lansa atakenan asina, e ta merece atencion publico pasobra no ta tur ora ta haya tipo di actonan frontal asina entre partnernan di coalicion. Y esey 'lamentablemente' ta pone riba prome plano. Normalmente sa pasa cu entre dos diferente partido tin diferencia, cu no ta nada straño. Y e ora e dos lidernan (dependiendo con serio e situacion bira), ta cay aden y ta resolve esaki internamente. E biaha aki sinembargo, a opta pa e parlamentario di e partido MEP ‘ataca’ e lider di e partido di coalicion publicamente. Y envez cu e lider opta pa atende cu esaki di otro forma, e la opta pa bay publicamente contra e parlamentario aki. No sa si esaki tabata e miho forma, pero tempo lo mustra ki consecuencia esaki por tin. Loke ta hunga un rol tambe, ta cu e parlamentario tabata ocupa un funcion anterior den un departamento cu no ta cualkier departamento. Un polis cu rango halto, a opta pa den politica inicia e ‘guera’ aki. Y e lider di e partido contrario, a opta pa usa netamente e angulo ey, pa contra aresta e ‘guera aki’, cuestionando integridad di e ex agente policial aki y cu ne henter e cuerpo policial. Pues por papia di dos persona cu ‘no ta zomaar iemand’, esta cu ta trata di hendenan cu ‘mester sa miho’ y cu ta actuando riba un nivel cu no ta esun miho.  

Experiencia ta bisa tambe cu hopi biaha, tipo di ‘confrontacionan’ aki ta netamente pa ‘consumo publico’, y no necesariamente ta refleha e realidad entre e personanan. Nan mes hopi biaha ta bisa loke nan tin cu bisa y ta ‘lague te ey’, y ta sigui cu nan bida. Esaki mientras cu e publico mes ta coi e informacion y ta dune un bida (cu ayudo di medionan ) sin cu e ta refleha e realidad di e asunto. E politiconan mes ta bon cu otro personalmente, mientras cu e publico ta biba y pensa cu ‘tin un guera serio’ cu consecuencia fatal pa e coalicion, siendo cu esaki por ta lo mas leu di berdad. Tempo lo bisa, y lo wak si ta necesario pa e lidernan (e otro lider anto) cay aden y ‘remedia’ e asunto aki, prome cu e bira un ‘crisis’ di berdad.