Spesialistanan di CMC: ‘Nos uido a bai atras i lo bai atras mucho mas si nos no bin cu un solucion’

WILLEMSTAD - Dr. Sepp Theunissen ta anestesista i miembro di Medisch Staf Bestuur, e organisashon di médiko na CMC. Den un entrevista ku Extra e  ta splika pa ki motibu MSB siman pasá a skirbi un karta habri pa pueblo di Kòrsou. Theunissen ta un di e dos firmadó di e karta. E ta splika ku e ta traha komo médiko pa mas ku 30 aña na Kòrsou. “Den e periodo mi a mira hopi kos. Pero e kos ku mi ta mira awor, e situashon ku nos ta den komo sektor médiko, nunka mi a mira den mi bida profeshonal. Nos kuido a bai atras i lo bai atras muchu mas si nos ta sigui bayendo e mesun kaminda.”

Segun Theunissen Kòrsou semper tabatin problema pa haña spesialistanan, pero e situashon awor ta hopi malu. Manera ta konosí, spesialistanan di CMC no ta di akuerdo ku gobièrnu na fin di 2024 ke kuminsá apliká e Landsverordening Normering Topinkomens (LNT) pa spesialistanan médiko empleá na CMC. Segun nan esaki lo tin komo konsekuensia ku e ta bira hopi mas difísil pa atraé bon spesialista médiko pa traha na CMC i tambe dòkternan básiko. Nan ta teme ku e tempu di espera pa operashon i pa risibí un promé sita na poli lo bira inaseptablemente haltu den futuro serkano. Ku esaki, segun Theunissen e futuro di kuido hospitalario na Kòrsou lo ta na peliger.

Te ainda spesialistanan no a haña un reakshon ofisial for di minister di Salubridat, Medio Ambiente i Naturalesa Javier Silvania riba nan karta, ku nan a manda gobièrnu tambe.

Spesialista Vito Koeijers, ku ta un ‘plastic chirurg’ basta konosí, ta splika den e entrevista ku e ta lamentá esaki hopi. Segun Koeijers gobièrnu i hospital tin ku sinta na mesa. “En bes di esaki nos ta bringando i nos ta buskando yen motibu pa falta otro hende. Pero esaki no ta e solushon.” Den e entrevista Koeiers ta dirigí su mes na gobièrnu. E ta bisa ku: “Gobièrnu bo tin falta, pero e gobièrnu promé tambe tin falta i esun promé di esaki tambe. Den e último trinta aña tur gobièrnu a drumi. Komo konsekuensia nos tin hopi hende ku salu malu na Kòrsou. Awor nos ta biba den un pais ku masoménos 160.000 persona i den hospital nos tin 85 stul pa dialisá. Ku ta hopi haltu. Por ehèmpel na Hulanda un siudat ku 160.000 abitante no mester tin mas ku 35 stul pa dialisá den hospital.”

E ta di opinion ku esaki ta konsekuensia di falta di maneho fo’i gobièrnunan den e último dékadanan. “Nos tin hopi hende ku preshon haltu, ku suku i ku ta sufri di sobrepeso.” E ta invitá minister di Salubridat Javier Silvania pa bin hospital i sinta na mesa ku spesialistanan. “Legumai e bringamentu. Laga nos sinta i papia serio tokante un maneho serio pa nos prevení i pa nos ta yuda nos pueblo. Si nos no ta hasié esaki, hopi problema ta bin bek i lo oumentá.” NOTA: Texto ta scirbi den Papiamento fonetico di Corsou.