Aeropuerto a habri diasabra cu rijnan largo di pasahero cla pa biaha bek nan destino

ORANJESTAD – Centenares di pasahero, mayoria Mericano a para den fila largo den solo diasabra mainta, cu e intencion di bolbe nan pais bek, despues cu diabierna nan a ‘keda pega’ na Aruba pa un dia mas. Rijnan hopi largo mes por a mira awe mainta, cu ta parti di e 4 mil turistanan cu no a biaha diabierna debi na problema technico di airco cu a pone aeropuero cera practicamente henter dia. 

HABRI BEKAwe mainta 7’or aeropuerto a habri bek, pa asina cuminsa procesa e centenares di pasaheronan cu a keda pega. Tabatin polis presente pafo pa sigura cu tur cos bay suave sin problema. For di ayera, polis a staciona nan unidad mobil pafo, cu a bira nan centro di comunicacion pa asina sigura orden publico. Esaki lo ta e scenario henter dia awe, ora cu 4 mil pasahero purba bandona y yega Aruba di diabierna, y otro 5 mil cu tabata programa pa yega y bandona Aruba awe diasabra.