Prome detencion na St Maarten den caso di atentado riba parlamentario Arrindell

ORANJESTAD/PHILIPSBURG.- Outoridatnan polisial na St. Maarten a detené djamars 22 yüli un promé sospechoso den e investigashon di e kaso di tiramentu ku a tuma lugá 17 yüli na Cupecoy den kua lider di partido Oualichi Movement for Change (OCM), Olivier Arrindell tabata envolví. E kasá di Arrindell ku tambe tabata presente a risibí herida di bala ku a resultá fatal pe.

Polis den un komunikado emití konhunto ku Ministerio Públiko ta papia di aresto di un ‘persona di interes’ relashoná ku e kaso di tiramentu. “E aresto aki ta marka un paso signifikante den e investigashon ku ta andando den e kaso di tiramentu ku a tuma lugá den oranan lat di anochi i ku a kosta bida di 1 persona miéntras 2 otro persona, Arrindell i otro miembro di partido OMC Laurence Lake, a sali heridá.

Debí ku ta trata di un investigashon delikado i pa konservá integridat di e investigashon polis ta bisa ku no por duna mas informashon na e momentonan aki. “Kuerpo Polisial di St. Maarten i Ministerio Públiko ta komprondé interes i preokupashon di komunidat i ta komprometé pa duna informashon mas aleu asina ku esaki ta apropiá i sigur pa hasi.”

Kuerpo Polisial di St. Maarten i Ministerio Públiko ta yama komunidat danki pa nan koperashon i pasenshi den e periodo aki. “Seguridat di siudadanonan di St. Maarten ta keda nos prioridat di mas haltu.” NOTA: Texto ta scirbi den Papiamento fonetico di Corsou.