Sentencia completo di Corte Supremo riba habrimento matrimonio mesun sexo pa Aruba

DEN HAAG - E dos decisionnan di Corte Conhunto di Husticia di Aruba, Curaçao, Sint Maarten y di Bonaire, Sint Eustatius y Saba di 6 di december 2022, pa habri matrimonio cu personanan di e mesun sexo na Aruba y Curaçao, por wordo sosteni. Corte Supremo a dicta esaki awe mainta ora di Aruba. 

E CASO

Na Aruba y Curaçao, bao di legislacion vigente, solamente un homber y un muhe por casa cu otro. Na cada un di e dos paisnan, un grupo di interes a cuminsa procedura legal hunto cu dos persona di e mesun sexo cu kier casa cu otro. Nan ta argumenta cu ta contrario na e prohibicion di discriminacion ancra den tratadonan internacional y den Constitucionnan di Aruba y Curaçao cu personanan di e mesun sexo no por casa cu otro, mientras cu personanan di diferente sexo por. Meta di e proceduranan ta pa tambe haci posibel pa personanan di e mesun sexo por casa cu otro.

SENTENCIA DI CORTE DI PROME INSTANCIA

Corte di Prome Instancia di Aruba a dicta cu, tanten cu parehanan di mesun sexo no por cera matrimonio, si no ofrece un alternativa, manera un sociedad registra of otro entidad huridico, ta contrario na articulo 8 (ley di priva y bida di famia) y 14 (prohibicion di discriminacion) di e Convenio Europeo di Derechonan Humano (ECHR) y cu Pais Aruba pues ta actuando ilegalmente pa cu e demandantenan. Corte di Prome Instancia di Curaçao a dicta cu, en todo caso den ausencia di un alternativa manera un sociedad registra of entidad huridico comparabel, e exclusion di parehanan di mesun sexo for di matrimonio ta contrario na articulo 3 di Constitucion y cu e Pais Curaçao ta actua ilegalmente pa cu demandantenan debí na e exclusion aki.

SENTENCIA DI CORTE COMUN DI HUSTISIA

Riba apelacion, Corte a dicta den ambos caso cu e exclusion di matrimonio pa personanan di e mesun sexo ta contrario na e prohibicion di discriminacion ancra den Constitucion di Aruba y Curaçao. Segun Corte, e partnership registra, cu awor a wordo introduci na Aruba, no ta un alternativa completo. Di acuerdo cu e Corte, matrimonio tin un balor intrínseco (simboliko i emocional) cu ta transende e contrato di cohabitacion i e sosiedad registra. E Corte a tene cuenta cu e ophecionnan di opositornan di matrimonio di mesun sexo hopi biaha tin un base religioso. Libertad di religion mester ta garantisa, pero segun Corte e no ta bai asina leu cu un por impone su mes normanan y balornan religioso riba un otro. Corte a dicta despues cu no ta pafo di su tarea legal pa habri matrimonio cu personanan di e mesun sexo. El a determina cu, ora su desicion bira final, un matrimonio por wordo sera dor di dos persona di otro of mesun sexo i cu e registrado mester coopera den esaki.Tanto Aruba como Curaçao a apela contra e decisionnan aki na Corte Supremo.

DESISHON DI KORTE SUPREMO

Corte Supremo ta di opinion cu e sentencianan di corte por wordo sosteni. Corte Supremo ta declara prome cu tur cos cu den un caso manera esun en cuestion aki, e hues mester pisa dos interes contra di otro: e interes cu por ofrece protecion huridiko efectivo directamente na esnan enbolbí y e interes cu e hues mester eherce restriccion ora di interveni den un skema statutario pa formula. Den e caso aki, ta trata di discriminacion a base di orientacion sexual cu ta stroba esnan enbolbiden e libertad pa organisa nan bida personal. Nan tin un interes convinsente pa mira discriminashon aboli mas pronto posibel. Pa e texto na Hulandes, click AKI.