Na Corsou, un turista a keda ataca severamente pa varios cacho di rasa pitbull

WILLEMSTAD - Un turista a keda malamente mordé ayera mainta riba un tereno na Piscadera. Parse ku dos pitbull a ataká e turista aki i ora polis a yega nan a bai riba e polis tambe.

Polis i ambulans a keda dirigí rápidamente pa Piscadera kaminda tin konstrukshon tumando lugá pa un kaso di un persona ku kachó a morde. Politur tambe a presentá na e sitio ya ku segun e promé indikashonnan lo ta trata di un turista.

Na e sitio a topa un persona ku basta herida na su kurpa. E persona a konta ku pitbull a bin su tras i ora el a kai abou nan a atak’é. El a haña bastante mordé rònt su kurpa.

Na momentu ku polis a yega na e sitio, un di e kachónan a bin riba e agente i esaki mester a tir’é. E kachó no a muri pero a bai dòkter kuné. Tambe ambulans a transportá e turista pa CMC pa tratamentu médiko. Di bosero polisial EXTRA a komprondé ku e persona víktima a keda interná, teniendo na kuenta e kantidat di mordé ku el a haña.

Parse ku e doño di e kompleho den konstrukshon lo tin basta kachó pitbull riba su tereno pa seguridat. Kon bin e dos kachónan a sali esei polis lo tin di investigá. E turista no tabata kana riba tereno privá segun EXTRA a komprondé pero riba kaminda públiko.

Normalmente den kasonan asina aki ku kachó sali for di su kurá i ataká hende, lei ta indiká ku ta konfiská e kachónan i despues nan ta keda likidá tambe si resultá ku nan a subi kaya i kousa daño. NOTA; Texto ta scirbi den Papiamento fonetico di Corsou.