Embeyecimento di strip di Eagle Beach mester percura pa mas sombra y ambiente tropical

ORANJESTAD - Diamars mainta Minister di Turismo y Salud Publico sr. Dangui Oduber a bishita Eagle Beach pa wak e progreso di e proyecto pa embeyece e strip di Eagle Beach. E plantamento di matanan local ta pa asina trece mas sombra y ambiente tropical pa nos local y turistanan. E proyecto aki ta core for di e retonde di Amsterdam Manor te cu e retonde di Alhambra. 

 E ta un proyecto cu ta un colaboracion entre Tourism Product Enhancement Fund (TPEF), Aruba Tourism Authority (ATA) y DOW cual ta supervisando e trabounan. E proyecto aki di “beautification” ta den su fasenan final unda ta embeyece henter e strip di Eagle Beach den cuadro di e mehoracion di nos producto Aruba. Pa duna un experiencia mas agradabel ora di warda pa coi un bus, awo lo tin sombra pa nos bishitantenan y nos localnan door di mata di Aruba, na luga di concret.