Beryl a drenta Caribe pero no ta forma menasa pa Aruba

ORANJESTAD – Horcan feroz Beryl a drenta laman Caribe,  recobra su forza di categoria 4, y ta siguiendo cu e forza aki por lo pronto. E caminda tambe a cambia un poco, cu ta nifica cu e lo pasa mas cerca di Aruba cu anteriormente anuncia, pero asina mes e no ta un menasa directo. Ta premira si cu e forza ta afecta e tempo rond di nos den forma di laman bruto, olanan halto y un posibel ‘zuidwest’. E cambio di direccion por traduci si den mas chens pa yobida, algun di nan duro. Loke ta algo sigur ta cu e pasada ta chupa e biento den nos region, haciendo e situacion na Aruba mas sofocante. Loke ainda no ta determina, ta kico exacto e horcan lo haci unabez cu e ta pa nort di nos y sigiu su caminda. Esaki pasobra tin chens cu e por tin un rabo cu por afecta nos manera tabata e caso den pasado. Pesey e oficina di crisis (CMO) ta vigilando netamente e parti ey, pa wak si mester tuma accion consecuentemente. 

E CIFRANAN

Segun e ultimo informacion di 5’or ora di Aruba, Beryl tabata ubica 205 km noordwest di Grenada, y tabatin biento di 240 km (12 km leu di yega categoria 5). E ta moviendo direccion west Noord west cu forza di biento di 33 km pa ora.