Awor a keda na Corte Supremo pa dicidi riba ley matrimonio mesun sexo pa Aruba

ORANJESTAD – Despues cu Parlamento un biaha mas a empata su votacion pa cu e ley di matrimonio di mesun sexo, cu consecuencia cu e ley awor ta destrui, tur wowo ta riba e sentencia di Hof otro luna cu tin cu dicta nan sentencia. Aña pasa October e caso a keda presenta dilanti Hof na Hulanda, y awor na juli, e sentencia ey ta bira conoci. Esnan cu ta sostene e ley, a vocifera diaranson cu nan speransa ainda ta den e sentencia ey. “Nos a warda hopi caba, kico ta 3 siman mas’ e presidente di e fundacion Orguyo, Henriquez a bisa. 

ABOGADO GENERAL

Manera ta conoci, Abogado General ta duna un conseho cu Hof ta sigui mayoria biaha, pa no bisa, semper. Y e conseho duna, tabata cu mester habri e matrimonio pa pareha di mesun sexo, manera cu corte di prome instancia a dicta anteriormente dos aña pasa. E sentencia ey ta 12 di juli 2024, unda cu lo tende si ta mantene e sentencia ey realmente of ta rechasa esaki. 

ABSTENE

Parlamentario di partido MEP, Shailiny Tromp-Lee cu ta esun cu a abstene di vota, creando e impasse y empate, a bisa tambe prome cu e votacion, cu e lo a abstene un biaha mas, pasobra e tin un dilemma cu e ley aki y no por sali afo.