TNO: Contracto pa LNG ta frena produccion sostenibel di coriente pa Aruba

ORANJESTAD – Segun e rapport pa transicion di energia pa Aruba, presenta pa e minister di Energia Hulandes Rob Jetten, TNO ta mustra e.o. cu e contracto cu Aruba a cera cu  compania pa provee LNG (EAGLE LNG), ta ‘frena’ e produccion sostenibel di coriente. Ademas, e rapport tambe ta bisa cu ‘tin masha poco conoci di e acuerdo di entrega di LNG’. Algo cu ya caba tabatin keho ariba pa e falta di transparencia riba e contracto aki. ‘Segun entrevistanan haci nos ta compronde cu tin un palabracion estilo ‘tuma of paga’ pa un cantidad di LNG pa 50% di e produccion di coriente y cu e acuerdo tin un duracion di 20 aña’. Segun TNO, esaki ta nifica cu te cu por lo menos 2046 of 2047, tin gasto adicional pa aumenta e accion di electricidad renobabel riba 50%, pasobra si tuma menos LNG, mester paga toch. Ta despues di 2047 numba por aumenta e parti renobabel cu mas energia di biento of solo. ‘Aki e espacio limita di Aruba un factor’. Esaki pasobra segun TNO, un sistema cu solamente biento y energia ta pidi un sobre capacidad den direccion di 100% renobable pasobra 2 pa 3 luna pa aña, tin casi nada di biento na Aruba’. Ademas, segun TNO, hidrogeno ta wordo evalua pa riba termino largo bira un alternativa flexible y como produccion di electricidad como ‘backup’. Pero, segun TNO su rapport, e plannan pa hidrogeno ainda no a ser desaroya totalmente, fuera di un MoU firma entre gobierno di Aruba y e compania Spaño ACCIONA Energia, pa desaroyo di un proyecto electrolis acopla na 50-60MW produci pa solo.

DESEO DI MINISTER

E rapport ta sigui papia di e expancion di produccion di panelnan solar y cu esaki lo aumenta debi na e deseo di e minister di economia (Wever) pa un transicion di energia inclusivo. ‘Pa logra pa tin mas energia solar riba daknan na ARuba, ta crucial pa inverti den e red di electricidad na Aruba’. 

TRANSISION MAS DIFICIL CU CORSOU Y ST MAARTEN

Segun e rapport, e transicion di energia na Aruba, organisatoriamente ta mas compleho cu na Corsou y St Maarten. Esaki pasobra e produccion y transporte di e electricidad ta den man di dos diferente compania, esta WEB y ELMAR. Esaki ta sugeri, aunke no ta menciona esaki specifico den e rapport, cu si nan ta un solo compania, e lo ta algo miho manera cu ta e caso na tanto Corsou (Aqualectra) y St Maarten (GEBE). Pa logra mas, mester tin un cooperacion hopi cera entre Utilities, e compania madre y WEB y ELMAR. Esaki pasobra segun TNO, e transicion di energia ta pidi pa plannan integral di e generacion renobable den relación cu e ampliacion di e red electrico. Y finalmente, regulacion di e companianan di utilidad ta reparti riba varios ministerio. ‘No tin un regulado independiente riba e tarifa di energia manera ta e caso na Corsou cu BTP’, e rapport ta sigui bisa. Pa lesa e rapport completo, click AKI.