PVV no ta garantisa continuacion di maneho di van Huffelen pa cu asuntonan di Reino

WILLEMSTAD - Awor ku ta partido PVV ta bai nombra e sekretario di estado nobo pa Relashonnan den Reino un bientu di kambio lo supla den e departamento i den e partinan di Reino den Karibe, tantu na Islanan Ariba (“bovenwindse eilanden”) komo Islanan ABC (“benedenwindse eilanden”). Asina parlamentario pa PVV Peter van Haasen a bisa durante reunion di komishon fiho di Tweede Kamer Hulandes ku sekretario di estado Alexandra van Huffelen.

Riba preguntanan di parlamentario pa Groen Links/PvdA, Raoul White relashoná ku e ponensia aki Haasen a bisa ku e ta sinti falta di informashon miéntras ta trahando maneho. Na su opinion por hiba krenwá yen di plaka pa e islanan den Karibe, pero ku tin sufisiente informashon sufisiente pa e maneho ku ke hiba, esaki lo ta tiramentu di plaka afó.

White a sigui puntra riba e ponensianan di Van Haasen i si e siguiente sekretario di estado di PVV lo kontinuá ku e maneho ku Van Huffelen ta laga atras. Riba esaki Van Haasen a bisa ku e no por garantisá ku e sekretario di estado lo sigui e maneho ku ta hibando aworakí bou di Van Huffelen, pero ku ta e sekretario di estado nobo mes lo mester determiná ki maneho e ta bai hiba.

Djárason tabata  posiblemente e último debate ku e komishon di relashonnan den Reino di Tweede Kamer a hiba ku Van Huffelen mirando e proseso di formashon di un gobièrnu nobo ta den su fase final. Manera anunsiá djamars último PVV lo ta e partido ku den e koalishon di PVV,VVD, NSC i BBB lo nombra e sekretario di estado nobo enkargá ku Relashonnan den Reino i Digitalisashon.

E nòmber ku mas ta bai rònt pa okupá e funshon aki ta Zsolt Szabó. Szabó tabata miembro di Tweede Kamer pa VVD di 2003 pa 2006 durante gabinete Balkenende II i tabata bosero di e frakshon riba tópiko di ICT. Komo minister enkargá ku Asuntunan di Interior i Relashonnan den Reino ta menshoná ku partido NSC lo nombra Judith Uitermark.

Van Huffelen den e debate a para ketu na su añanan komo sekretario di estado i a bisa ku e ta orguyoso di loke a logra a base di drecha relashonnan ku partnernan den Reino. A papia hopi ku otro riba futuro di e relashonnan den Reino i lasonan históriko ku e paisnan tin ku otro.

“Tambe a wak kon por usa e mihó relashonnan pa traha palabrashon ku otro riba relashonnan finansiero i di gobernashon.”  Van Huffelen ta bisa ku e ta orguyoso ku a dal pasonan positivo den e kuadro aki ku tantu e islanan BES komo e paisnan den Karibe kaminda a firma un areglo mutuo pa implementá reformanan.

Relashoná ku e reformanan aki Van Huffelen ta di opinion ku a dal pasonan pa drecha e situashon di maneho finansiero, edukashon, kuido médiko, servisio públiko i hasi palabrashon riba kompania di seguro ENNIA, ounke ku tin hopi trabou pa tuma lugá ainda. Tambe e sekretario di estado el a para ketu na rehabilitashon di Tula i e despensa ku Hulanda a pidi pa su ròl den negoshi di sklabitut loke a kontribuí na mihó lasonan di koperashon i kon pa sigui hasi e lasonan aki mas estrecho den futuro. NOTA: Texto ta scirbi den Papiamento fonetico di Corsou.