AG a pidi Hof pa destrui sentencianan anterior di Sevinger, Sussebeek y Arends den caso Avestruz

ORANJESTAD – Ministerio publico, na nomber di su Abogado General awe, den su rekisitorio, a pidi e tres hueznan den Corte di APelacion pa ‘destrui e sentencia inicial’ contra e sospechosonan Benny Sevinger, Leoncita Arends y Pieter Sussebeek, y mantene e sentencia di e otro 4 sospechosonan cu a apela nan sentencia inicial. Den un rekisitorio di 39 pagina, Abogado General van Unnik a splica e esencia di e caso y despues a bay riba cada un di e 7 sospechosonan pa mustra nan ‘actonan’ pa cual nan ta wordo sospecha. 

KICO TA E ESENCIA DI AVESTRUZ

E caso Avestruz manera cu e AG a ilustra, ta riba supuesto iregularidadnan den otorgamento di opcion y derecho di tereno erfpacht durante e termino di Sevinger como minister di infrastructura den e periodo 2009-2017. E sospecho ta cu Sevinger a duna un trato preferencial na personanan liga cu e partido AVP, di cual Sevinger tabata representa den Gobierno. 

E amigonan aki a sigui pa bende e companianan cu derecho di e terenonan, na tercera personanan pa hopi placa, pa cual, segun OM, e personanan aki y Sevinger, a probecha financieramente grandemente.   

SPECULA OF NO

OM a sigura dialuna cu e investigacion den Avestruz, no ta bay pa speculacion cu tereno, of si e traspaso di e accionan di e companianan cu a ricibi esaki, a bay segun regla di ley of no. “Loke ta e punto aki, ta cu un cantidad di sospechoso aki, pa medio di cierto entidad legal, a pretende di ta desaroyadornan serio cu intencion pa haya e derecho riba e terenonan comercial erfpacht, di pais Aruba, cu e unico meta, tabata pa despues di optene e derecho aki, bende e accionan di e entidad legal mas lihe posibel, pa hopi placa na tercero. Riba e manera aki, nan a estafa Aruba” e AG a bisa. Esaki ta lansa e pregunta segun OM, pakico e cumpradornan di e accionan aki mes no a busca e derecho di e terenonan erfpacht. Algo cu lo a sali nan hopi mas barata, envez di cumpra accionan caro. 

NO KICO BO SA SINO KEN BO CONOCE

E AG ta sigui den su rekisitorio, splicando cu e diferencia ta pa sa si bo tabatin bon relacion cu e minister e tempo ey of no. Aki tambe ta trata e soborno di e minister, y su abuso di poder como tal. A splica cu den un bon democracia, e confiansa di ciudadano ta necesario. Pa esey, ta necesario pa tin un gobierno integro. Integridad ta e base. Si dentro di aparato gubernamental viola e integridad aki, door di soborno of trato preferencial na conociu, e ora derecho penal ta bin na turno”. Y segun AG, e paso ey tambe OK a tuma cu e investigacion di Avestruz. 

INTENCION

Ministerio publico dialuna a rekiri pa confirmacion di e sentencianan di e prome huez, pa loke ta e personanan 

Werleman, Mansur, Harms y Nunez y pa destruccion di e sentencia di e prome huez pa loke ta trata e sospechosonan  Sevinger, Susebeek y Arends.