ORANJESTAD – Parlamentario y ex minister Benny Sevinger no ta sigur si e ta participa den e eleccion Parlamentario di otro aña. Asina Sevinger a bisa Noticiacla e siman aki. E ta bek den corte, e biaha aki di apelacion, pa bringa su caso y purba logra absolucion total di e cargonan cu tin contra dje den caso Avestruz. Segun Sevinger, e lo bay ‘all the way’ pa cu e caso. Esaki ta nifica cu si dado caso e perde den apelacion tambe, e tin planea pa bay casacion. Y a compronde di dje, cu si tin un sentencia den casacion promek cu eleccion y e no sali liber, obviamente e no ta participa. Pero e ta premira cu pa e ora ey, no tin sentencia ainda. Y manera cu e mes a bisa e portal aki, mientras cu e caso ta den proceso, e por participa den eleccion.
PERSONALMENTE
Pero personalmente e no a dicidi ainda si e ta participa of no. E ta bisa cu ta keda na partido (AVP:red) si e ta participa atrobe. “Si partido kier, mi ta participa atrobe”, Sevinger a sigui bisa Noticiacla. E decision ey no a cay ainda. Ultimo eleccion aunke cu e tabata envolvi den e caso, e la participa, y a saca su mes. Pues no ta kere cu lo tin problema pa partido bolbe pidie pa participa. Di otro banda, Sevinger a confirma tambe cu su yiu muher ta preparando pa participa y drenta partido y posiblemente bay eleccion. E no por a bisa si esey kier men cu si e yiu participa, e mes ta keda afo, of si bo por haya dos Sevinger riba e mesun partido participando contra otro.
ULTIMO ELECCION
Ultimo eleccion, den un forma pa mengua e situacion interno di partido, a opta pa laga Sevinger carga e partido, poniendo e riba e ultimo lugar. Asina mes e la logra saca su mes, siendo den KIA e tempo ey. Ora cu parlamentarionan a huramenta e tempo ey, e no por a huramenta, pasobra gobernador a warda pa e ta for di prizon, pa e por a haci esaki.
ORANJESTAD – Minister di finanza demisionario Xiomara Maduro a contesta presidente di Parlamento Gerlien Croes dialuna, cu no mester tin ningun excuse pa trata e presupuesto 2025. E la reacciona despues cu siman pasa Croes a indica cu ta wardando riba Gobierno, pa por trata e presupuesto pasobra Gobierno ainda falta pa manda cierto documetonan. For di e contesta di Maduro por compronde cu Gobierno a manda tur cos caba. “Desde siman pasa e contestanan di Gobierno tambe a bay pa Parlamento, pues Presidente di Parlamento tin tur informacion pa asina por yama e reunion publico pa atende cu Presupuesto 2025” Maduro a bisa den un reaccion publico.
ORANJESTAD – “Nos a tuma nota tambe di menasa nan contra di Cuerpo Policial, y esaki sigur no lo ser tolera” tabata parti di un reaccion dialuna di minister demisionario di husticia Rocco Tjon na Noticiacla riba e caso lamentable di fin di siman unda cu un polis a tira un persona mata durante un persecucion. “ Na prome lugar kier manda palabranan di condolencia y forsa na famia di e fayecido”: e mandatario a cuminsa na bisa Noticiacla.
ORANJESTAD – Dialuna mainta a habri cu un confrontacion entre lider di fraccion di partido PPA Otmar Oduber y e presidente di Parlamento Gerlien Croes. Ora cu Oduber tabata hiba su disertacion durante tratamento di presupuesto di Algemene Rekenkamer van Aruba (ARA), e presidente a hala atencion di Oduber mirando cu e lo tabata desviando di e tema y a bay riba e aumento di botter di gas. Aki Oduber a irita y a mustra Croes cu e no por interumpie den un disertacion. Ademas a referi na e hecho cu Croes awor ta forma parti di e siguiente gobierno, cu ta culpable pa e aumento aproba. Esaki pasobra ta e minister actual Geoffrey Wever, cu lo forma parti di e proximo gobierno, ta responsabel pa e aumento. A keda un bay bin chikito entre e dos personanan aki awe mainta. Remarcable ta cu e segmento di e video aki ta poni riba e propio pagina di facebook di Parlamento di Aruba.
ORANJESTAD – Partidonan AVP y FUTURO a yega na un base di acuerdo pa traha hunto. Esaki ta e mensahe principal cu e formadornan Mike Eman y Gerlien Croes a informa Gobernador di Aruba SE Alfonso Boekhoudt diabierna mainta. Esaki ta confirma e noticia di ayera di noticiacla, cu a raporta cu tabatin huma blanco, usando e referencia na ora cu scohe un pontifice nobo, cu ta nifica den e caso aki cu partidonan realmente a haya otro pa traha cu otro. Ademas di loke a keda declara, a confirma cu lo bay forma un gobierno cu 7 minister, di cual 5 ta bay pa AVP y 2 pa FUTURO. Ken ta bira kico, ainda no ta conoci y awor lo traha riba esey. A mustra tambe riba e proceso nobo di screening, cu ta pone cu lo tuma mas tempo awor pa esaki keda cla y a pidi pa tene cuenta cu esaki. E proximo encuentro cu gobernador lo ta dia 18 di februari 2025 proximo, y e momento ey por duna un miho bista cuanto tempo mas lo dura prome cu por bisa miho pa ki tempo por papia di huramentacion di e gabinete nobo.
ORANJESTAD – Tin huma blanco pa loke ta e proceso di formacion di un gobierno nobo. Noticiacla a compronde cu inoficialmente e partidonan AVP y FUTURO a haya otro y ta cla pa formalisa nan acuerdo e siman aki. Inoficialmente pasobra e ta bira oficial te ora cu e keda presenta na Gobernador di Aruba, SE Alfonso Boekhoudt cu por sosode mayan diabierna despues cu e dos formadornan topa cu Gobernador. E detayes completo no ta conoci, pero loke si por bisa ta cu despues di un bay bin henter e siman aki, partidonan a keda cla si, y awor mester anuncia e lista oficial di cartera di minister, pero mas importante, e detaye di e programa di gobernacion di e gabinete. E no tabata un proceso facil, Noticiacla a compronde, pero, awor si ta cla y lo tin un gabinete nobo. Tin varios lista cu ta circula di e carteranan y ken lo bira e respectivo ministernan pa e respectivo partidonan.
DEN HAAG / ORANJESTAD – Prome Minister Evelyn Wever -Croes dciahuebs 6 di februari, a reuni y na e mesun momento cera conoci cu Minister President di Hulanda, señor Dick Schoof. Durante e reunion a trata diferente punto di interes, pero e prome punto cu e Premier Hulandes tawatin riba su agenda a trata e maneho financiero responsabel di pais Aruba. Riba esaki Prome Minister di Aruba a duna e mandatario Hulandes un relato detaya di tur e trabounan cu a haci y ta haciendo pa Aruba ta financieramente stabiel na e momento aki.