Oduber: Cuenta annual 2023 di ATA ta confirma e miho aña den historia di turismo

ORANJESTAD –Dialuna atardi Minister di Turismo y Salud Publico sr. Dangui Oduber conhuntamente cu management di ATA, Board di ATA, management di AHATA, representante di Grand Thorton y ministerio di Turismo tabata presente pa un reunion di ATA su reportahe anual. Ta pa remarca cu e indicadornan cu ta midi resultado a demostra cu aña 2023 tabata e miho aña den historia di Aruba pa cu turismo. 

ATA a presenta e indicadornan cu a midi aña 2023 su logronan, unda a utilisa 90% di e presupuesto pa mercadeo y promocion di Aruba. Indicador principal cu ta midi e resultadonan ta tourism receipt, tourism arrivals y average daily spend. Tourism receipt a crece cu 13.4% compara cu 2019, indicando un recuperacion fuerte y mas placa den nos economia.  Ta pa remarca cu tourism receipts tawata mas halto cu e yegada di turistanan y esaki ta indica un cambio positivo den cantidad di turista pa calidad di turista.

Loke ta remarcabel ta e crecemento registra for di nos mercado principal cu ta e mercado norte americano. ATA ta mercadia den diferente mercado, como Norte Americano, Sur Americano y Europa. Cada mercado tin nan mesun manera pa promove y ta adapta e mensahe y e promocion.

Ministerio di Turismo tin e responsabilidad pa segura cu Aruba su economia ta sigui crece mientrastanto liderando cu practica di un turismo sostenibel. Proyectonan di sostenibilidad y innovacion ta aliniando cu e vision pa un sector turistico mas resistente y innovativo integrando tecnologia nobo pa mehora e experiencia total di e bishitante. ATA a presenta su “Destination Development Plan” cu a  ilustra tur e proyectonan cu a cuminsa y lo wordo ehecuta pa un turismo mas sostenibel.