Minister a anuncia mando nobo temporal na Cuerpo di bombero

ORANJESTAD - Cuerpo di bombero temporalmente tin ekipo nobo di maneho. Por lo menos asina minister di husticia Rocco Tjon a anuncia diaranson mainta riba su pagina di Facebook. Esaki despues cu a manda esun cu tabata na cabes, Emilio Geerman cas recientemente. “Awe mainta nos a reuni cu e miembronan nobo di e management team di brandweer. Esaki mirando e ultimo desaroyonan” e minister a cuminsa na bisa.

SCHOOP TA LIDERA AWOR

Segun Tjon, Sr. Schoop, cu amplio experencia riba tereno di maneho y liderazgo lo fungi como presidente di e management team. Alabes, e lo wordo reenforsa cu sr. Corea cu tin amplio experencia di e organisacion como cu e mes a traha pa hopi aña den e cuerpo, y por ultimo sr. De Cuba lo keda forma parti e team di maneho.Tur esaki e mandatario di husticia a laga sa. Durante e reunion cu sindicato a toca e puntonan di enfoke cu e team di maneho lo bay priorita. Alabes a splica tambe di e pasonan cu nos ta tumando, conhuntamente cu DRH, pa a corto plaso haya refuerso di algun officier di Hulanda pa un tempo mas largo.

GEERMAN

Tabata recientemente cu a dicidi di manda Geerman cas despues cu e lo a actua incorecto den publico, y a opta pa mande cas. E portal 24ora.com a raporta e tempo ey cu Geerman lo a wordo gara coriendo auto, bou influencia y cu e lo a crea problema. Esaki tabata suficiente pa e minister dicidi pa suspende Geerman pendiente un investigacion.