Aruba ta conoce su di 4 morto di trafico pa 2024

ORANJESTAD - Diadomingo anochi pa mas o menos 11:15 central di polis ta wordo notifica di un accidente riba e caminda di Camacuri na altura di Aruba Bank. Un auto lo a alcansa un peaton. 

Central di polis ta despacha unidadnan di polis na e sitio di e sucedido. Na yega di e prome patruya ta bin encontra cu un persona masculino banda di caminda y tabata mustra hopi critico. Mirando su situacion a pidi ambulance cu maximo urgencia. Na e sitio polis ta topa tambe cu e auto KIA Sportage color preto A-18809. Polis a aserca e chauffeur na unda ta constata cu e lo ta bao influencia alcohol y ta bay over na test e. Mirando e resultado a detene e chauffeur di e auto KIA Sportage . Un rato despues ambulance ta presenta pero no por a haci nada mas pa e victima. Pa 11:45 dr Texier ta constata morto di e homber inicial A.J.B. naci na Brazil di 54 aña di edad y bibando na Aruba. Specialista di trafico y polis technico/forensico a presenta na e sitio pa haci nan investigacion.Departamento di Slachtofferhulp tambe a presenta.Te cu awor no por haya famia di e fayecido y Cuerpo Policial ta haci un apelacion na famia di e fayecido pa por tuma contacto cu e central di polis yamando na e number di telefoon 100, pa asina departamento di trafico por tuma contacto cu nan. Noticiacla y Cuerpo Policial Aruba ta manda palabra di condolencia na famia di e fayecido.