- Minister Hulandes di Husticia van Weel a bishita wardanan di polis na Aruba awe
- Van Haasen(PVV): Bergonsoso cu na Corsou, partido lidera pa hende cera den prizon, ta bay eleccion
- Veldkamp: Hulanda lo actua contra Venezuela despues di expulsion di diplomaticonan
- Feco Gomez(AMAK): Arubianonan ta participa atrobe den festival di Tumba di Corsou
- Zoetrum (CTB): Corsou tin un sin fin di actividad pa Arubianonan den 2025
Banco Central ta mantene e tasa di reserva obligatorio na 22,0 porciento
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
E CMM a considera e siguiente informacion y analisis den su deliberacion.
RESERVANAN INTERNACIONAL Y OFICIAL
E reservanan internacional, cu ta consisti di reservanan oficial di BCA y reservanan di divisa na e banconan comercial, a subi cu Afl. 83,8 miyon te cu 9 di februari 2024, compara cu december 29, 2023 (Grafico 1). E reservanan oficial a expande cu Afl. 132,0 miyon, mientras cu e reservanan na banconan comercial a baha cu Afl. 48,2 miyon. Consecuentemente, te cu 9 di februari 2024, e reservanan oficial y internacional a suma Afl. 2.777,7 miyon y Afl. 3.145,8 miyon, respectivamente.
Sostene un nivel adecua di reservanan ta esencial pa mantene e tasa di cambio fiho entre e florin Arubano y e dollar Mericano. Teniendo cuenta cu esaki, reservanan internacional a keda ampliamente riba e rekisito di tres luna di pago riba e cuenta coriente di e balansa di pago te cu 9 di februari 2024. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Reservanan oficial tambe a keda dentro di e margen aceptabel basa riba e metrico ‘Assessing Reserve Adequacy’ (ARA) di e Fondo Monetario Internacional (FMI)
INFLACION
Inflacion, midi na final di luna contra e mesun luna di e aña anterior, a yega 2,3 porciento na december 2023. E contribuyentenan principal na e inflacion, midi na final di luna contra e mesun luna di e aña anterior, na december 2023, tabata ‘comunicacion’ (contribuyendo cu 1,6 punto di porcentahe), ‘diferente producto y servicio’ (contribuyendo cu 0,4 punto di porcentahe), y ‘vivienda’ (contribuyendo cu 0,4 punto di porcentahe). Di otro banda, e componente ‘transporte’ (contribuyendo cu -1,0 punto di porcentahe) a mitiga e inflacion den december 2023.
E inflacion midi riba promedio di 12 luna a baha pa 3,1 porciento na december 2023; un caida compara cu 3,7 porciento na november 2023. E presion inflacionario tabata mas tanto debi na e subida den e tarifa di awa y coriente desde augustus 2022 y e aumento den prijs di cuminda y bebida no alcoholico. Ademas, Aruba a importa un gran parti di e crecemento den prijs for di su partnernan comercial, particularmente Estados Unidos y Europa.
Mientrastanto, na december 2023, inflacion basico (cu ta exclui cuminda y energia) a alcansa 3,1 porciento si midi e final di respectivo luna contra e mes un luna di e aña anterior (november 2023: 2,6 porciento). Basa riba un promedio di e ultimo 12 lunanan, inflacion basico a yega na 2,1 porciento (november 2023: 1,9 porciento).
LIKIDES EXCESIVO DI E BANCONAN COMERCIAL
Likides excesivo di e banconan comercial (incluyendo credito cu no a wordo aloca ainda y otro compromisonan) tabata Afl. 519,4 miyon na december 2023, esta, Afl. 78,7 miyon mas compara cu november 2023. Ora cu compara cu fin di december 2022, likides excesivo ta refleha un contraccion di Afl. 300,4 miyon. E caida aki tabata principalmente debi na refinanciamento di fiansanan internacional riba mercado local y compra di bono di gobierno pa inversionistanan institucional.
ATA: Tripadvisor ta premia Aruba como e ‘Mihor Destinacion den Caribe’
ORANJESTAD - Aruba Tourism Authority (A.T.A.) ta orguyoso di anuncia cu Aruba a wordo reconoci pa premiacion di Tripadvisor’s® Travelers’ Choice® 2024. E premio prestigioso aki ta honra destinacionan cu ta ricibi evaluacionan excepcional, consecuentemente Aruba ta bira e mihor destinacion den Caribe y e di binti cuater mihor destinacion di registro mundial riba Tripadvisor.
Diederik Kemmerling re-eligi como presidente di Camara di Comercio
ORANJESTAD – Diederik Kemmerling a keda re-eligi pa presidente di Camara di Comercio pa 2025. Conforme e stipulacion den ley, Camara di Comercio y Industria (KvK) ta representa comercio y industria di Aruba. E directiva di KvK, cu ta consisti di 9 miembro, ta wordo eligi door di representantenan di negoshinan grandi “grootbedrijf” como tambe di negoshinan chikito “kleinbedrijf”. Den e prome reunion di directiva di KvK, e miembronan ta eligi un presidente y un vice-presidente pa e aña actual. Alabes ta keda determina cual miembro lo fungi como e presidente suplente. E presidente y vice-presidente, hunto cu e secretario/director ehecutivo, ta forma e directiva diario di KvK.
Trahadonan di Caribbean Palm Village a bay den accion
ORANJESTAD – Entre 30 pa 40 trahado di Caribbean Palm Village a dicidi di pone trabou abou diahuebs mainta, pa protesta e hecho cu gerencia di hotel no ta cooperando cu e CAO nobo. Segun president di e sindicato FTA Jose Figaroa, e negosacionan pa e CAO nobo a tranca y trahadonan ta decidido pa bringa pa nan derecho. Por lo menos 3 punto ta cardinal, entre nan aumento salarial y bonus, cual e gerencia no kier condeci. A dicidi pa pone trabou abou, cu asina ta bira e prome accion pa 2025 na Aruba. E accion segun Figaroa, ta afecta e operacion ya cu ta encera personal di housekeeping y tambe front desk. Y si despues di e accion, cu tabata poni pa caba 10’or awe mainta no tin solucion, tin pensa pa escala esaki, pero e ora den fin di siman ora cu e efecto ta mas grandi.
ATA: Varios factor a pone British Airways cancela ruta di Aruba
ORANJESTAD – “British Airways a tuma e decision dificil pa descontinua su servicionan pa Aruba segun e proximo temporada di zomer”, asina CEO di ATA Ronella Croes a confirma e noticia di noticiacla diaranson. E ultimo buelo lo wordo opera dia 30 di mart 2025.
DIMP: Tarifa di inkomstenbelasting y loonbelasting a cambia entrante 1 di januari 2025
ORANJESTAD – Entrante 1 di januari 2025 lo tin cambio den e tarifa di inkomstenbelasting y loonbelasting. Manera conoci e mesun tarifa cu ta valido pa inkomstenbelasting ta valido tambe pa loonbelasting. E tarifa aki ta hopi importante tanto pa e persona priva, doño di trabou y comerciante cu tin empresa propio. E cambio ta encera un reduccion di e actual tarifa, cual ta nifica cu mayoría di e contribuyentenan lo bay paga menos inkomstenbelasting y loonbelasting den aña 2025. Specialmente e clase trahado lo bay ripara cu su doño di trabou lo bay retene menos loonbelasting durante 2025 compara cu 2024 y asina e empleado lo ricibi un suma di salario mas halto den su man. Pa loke ta e suma liber di impuesto, esaki ta keda Afl. 30.000.
British Airways ta stop cu su buelonan pa Aruba
ORANJESTAD – E aeroliña britanico British Airways ta stop di bula pa Aruba entrante maart di e aña aki. Ta exactamente despues di dos aña di a introduci e buelo aki pa Aruba, cu e ta stop. Tabata na maart di 2023 cu Aruba a yama bonbini na e prome buelo pa Aruba, despues di 10 aña di preparacion. Oficina di turismo di Aruba lo a confirma e informacion aki internacionalmente. E aeroliña tabata bula dos biaha pa siman pa Aruba. Dentro di poco, lo tin mas informacion riba e desaroyo aki.
Follow NoticiaCla
