Pelicula Hulandes Invasie, filma tambe na Marinierskazerne Sanaveta, ta yega Aruba otro siman

ORANJESTAD – E Paraiso turistico Aruba, ta wordo invadi pa un pais bisiña. Un scenario cu ningun hende kier pensa ariba. E realidad ta cu otro siman diahuebs, The Movies ta estrena e pelicula Hulandes INVASIE unda cu netamente esey ta sosode. Un pelicula basa riba un invasion militar riba tanto Aruba como Corsou. Y si a kere cu a usa décor y otro tipo di artefacto pa simula un scenario di guera, esaki ta robez. Pa e pelicula aki, e base di marinier na Savaneta y esun na Parera Corsou a wordo usa, completo cu ekipo y personal di marina real. 

REAL POSIBEL

E problema ta cu ta dificil pa marina real presta su ekipo pa algun dia na hende cu no tin experiencia, ‘djis’ pa un pelicula. Den e caso aki, personal di marina a opera e aparatonan manera boto, helicopter y submarino necesario pa e filmacion. E ekipo di filmacion a usa e base na Savaneta pa hopi di e scenarionan cual lo wordo reconoci durante e pelicula. E pelicula (noticiacla a raporta riba esaki como primicia algun luna pasa), ta cuminsa pasa den cine na Hulanda e weekend aki y ta yega Aruba otro siman diahuebs. No perde!.