AFBA: Casi 90% di miembro ta cera den siman pa scarsedad di personal

ORANJESTAD – Por lo menos 90% di e 55 companianan cu ta miembro di Aruba Food & Beverage Association (AFBA) mester a reduci nan operacion den siman debi na escases di personal. Asina e C.O.O. di e asosacion Miriam Dabian a splica diamars durante un conferencia di prensa. E problema ta cu debi na e escases, e trahadonan cu si tin trabou y cu ta trahando, tin hopi stress y mester descansa. Esey a pone cu e 90% di miembro mester a adapta nan operacion, cera algun dia den siman, pa asina nan por duna e trahadonan chens pa tin sosiego.

FALTA DI PERSONAL

E grito di semper, ta keda un problema esta escases di personal. Y hunto cu gobierno y otro instancia ta haciendo intento pa remedia e situacion. Pero e situacion ta problematico. Y riba pregunta di Noticiacla, miembro Pierre Kock ta bisa cu e situacion mas pio, no ta leu. Esaki pasobra tin un cantidad di hotel na caminda, restaurantnan cu ta habriendo cu ta pone extra presion riba e personal. Y personal capacita no tin hopi, y no tin tempo pa entrena personal pa funcionan clave. 

PERMISO

Un di e problemanan mas grandi, ta e parti di permisologia. Segun Dabian, ta purba busca mas tanto local, cu no mester di permiso, pasobra e proceso pa  haya un permiso pa un trahado, simplemente ta mucho largo y no ta rindi. A mustra p.e. cu si pidi un cita pa cuminsa proceso di permiso, ta haya cita te aki 2 pa 3 luna. Despues ta dura un eternidad prome cu e permiso pasa den henter e molina di proceso te pa e ta cla. Motibo suficiente pa enfoca mas riba local cu stranhero, pero localnan no ta hopi interesa.

BUSCA OTRO TRABOU 

Un punto tambe ta cu, mientras cu AFBA no ta considera esaki un punto negativo, hopi trahado ta bay di un trabou pa otro. Nan kier un mehoracion sea di funcion of salario. Ultimo feria di trabou a genera por lo menos 500 persona, di cual 90% (segun informacion cu Noticiacla tin) tabata hende cu tin trabou caba, y cu ta interesa pa bay di un lugar pa otro. Esaki ta crea problema pa e hotel of establecimento actual y ta positivo pa e lugar ‘nobo’.

SERVICIO

Un di e consecuencia ta cu e servicio ta bira menos, menos dia di operacion, menos servicio bon pasobra e personal ta cansa y tambe no por ofrece tur e servicionan cu normalmente mester tey. Tur esaki ta pone cu e ta afecta e servicio, cu consecuencia cu e turista ta busca otro destinacion pa biaha unda cu posiblemente si e servicio ta miho y completo. Na final, AFBA ta sigui bisa cu nan intento ta pa sigui busca un solucion pa asina hunto por combati e problema di escases di personal.