Casi 80% di numbernan di auto pa 2024 no ta paga ainda, y falta dos dia

ORANJESTAD – Casi 80% di automobilista ( ta inclui tur tipo di vehiculo di motor) na Aruba ainda no a paga nan number (plachi) di auto pa 2024. Esaki ta serio, mirando cu falta ainda 2 dia so pa cumpli cu e fecha pa e prome mitar di aña 2024 (e fecha ta 31 di januari 2024). Asina vocero di departamento di impuesto DIMP, Meverly Romano a confirma durante un conferencia di prensa. E cifra ta alarmante, y ta demonstra e comportacion di nos comunidad pa no ta cumpliendo. Di otro banda, tin 21% (so) cu si a cumpli caba, cu sra Romano a gradici pa cu nan si cu a cumpli netchi na tempo. Mientras cu tin dos dia ainda pa paga, ta conciente cu dificilmente 80% por paga den e 2 dianan aki y ta implica cu multa lo cay pa hopi di nan.

PAGO Y REGISTRO

Oficialmente DIMP pa 2024 tin 89832 plachi registra cu ta inclui tur tipo di vehiculo di motor. E cantidad di automobilista cu no a paga nada ainda, ta 69 mil automobilista, cu ta 79% di e totalidad. E total di 18.371 si a paga (21%) cu ta esnan ‘bon pagado’. 

NO TA EXTENDE FECHA

Directora di DIMP Luenne Gomez a sigura cu no ta bay prolonga e fecha di paga, manera cu a haci den pasado, y esaki ta nifica cu tur hende tin 2 dia pa haci nan pago sea pa prome mitar of completo. E orarionan di DIMP ta conoci, tambe na e otro oficinanan di gobierno. Lo purba extende cierto ora manera keda habri durante ora di almuerso, pero fuera di esey no ta bay cambia nada. Ta mustra cu tur hende a haya e oportunidad pa te hasta paga poco poco for di September y October aña pasa, pa e peso ta menos e aña aki. Esnan cu ainda no a paga nada di 2023, tambe ta un cantidad, cu ta 14%. Esaki ta traduci na 12912 automobilista cu no a paga den 2023, sea mitar of completo. Esnan cu no a paga nada nada ta 4467 automobilista, mientras cu 8445 a paga mitar aña so. E dos gruponan aki a haya multa caba y nan mester paga nan debe di 2023 prome cu nan por paga 2024. Pa nan, obviamente e gastonan ta aumenta awor, debi cu nan a paga laat.