RDA: Victimanan di explosion di diaranson riba nan tereno ta recuperando

ORANJESTAD - Na e momentonan aki ainda e investigacion ta tumando luga cu e obhetivo pa sali na cla kico exactamente a sosode relaciona cu e explosion cu a tuma lugar e siman aki riba tereno di refineria. Asina Refineria di Aruba (RdA)  a informa diabierna atardi. Tabatin un silencio desde diaranson cu e explosion a tuma lugar, pero diabierna nan bin afor porfin y a duna detayes riba kico a pasa exactamente te asina ley cu nan por a bisa. Tambe nan a duna un actualisacion riba e victimanan di e explosion y a confirma cu no ta prome biaha algo asina a pasa.

KICO A PASA 

Segun RDA, ultimo biaha cu Aruba a experiencia un incidente riba e tereno di Refineria di Aruba (RdA) tabata día 25 di januari 2010 unda cu V3AR a pega na candela. Ta despues di casi 14 aña, cu lamentablemente Aruba ta pasa door di un susto semehante. Nan a splica cu diaranson ultimo, dia 10 di januari 2024 pa 10 or y 11 di mainta San Nicolas a keda impacta pa un explosion hopi fuerte. E explosion aki a tuma luga den cura di "warehouse" riba e tereno di nos refineria. Un vacuumtruck a rementa durante un trabou andando riba tereno. Den e suceso tres persona a resulta herida. Inmediatamente e ekipo di emergencia a activa y a tuma control pa mitiga e situacion.

 RdA  a sigura cu na mesun momento a instala un ekipo interno pa conduci un investigacion profundo.  

E VICTIMANAN

Pa locual ta trata e tres victimanan, RdA a keda monitoria cada un di nan situacion y por comparti cu comunidad di Aruba cu tur tres ta stabiel. E tres personanan envolvi ta un peaton, e chauffeur di truck y su ayudante cu tabata como pasahero.

E PEATON

Pa locual ta trata e peaton, despues di control medico, e por a bay cas di biaha. E chauffeur a keda un día pa observacion, pero tambe ya caba ta na cas bek. E ayudante, cu ta e di tres herido den e incidente, ta esun di mas grave. Pero nos ta contento di por comparti cu e ta den un situacion stabiel y a sali for di I.C.U. pero ainda ta bou di observacion.

 EFECTO PA COMUNIDAD

Ta importante pa informa comunidad cu, no obstante e suceso, no a afecta e distribucion di producto y no tin daño na infrastructura cu por tin efecto di interupcion di distribucion pa Aruba.