Hulanda lo meter tuma decision nobo riba interes reduci pa Aruba, debi cu no a cumpli cu deadline

DEN HAAG – Mirando cu Aruba no a cumpli cu e di dos ‘condicion’ pa e haya un tasa di interes mas abou pa e refinanciamento di e debe di Covid19, entrante 1 di januari 2024 no ta drenta na vigor pa Aruba. Ademas mirando cu e deadline a pasa, gobierno Hulandes lo tin cu tuma un decision nobo riba e tasa di interes pa Aruba. Asina e secretario di estado Hulandes Alexandra van Huffelen a splica Noticiacla diabierna mainta. Por a compronde cu esaki kier men cu no sa awor cuanto e interes lo ta cu Aruba por haya, reduci. 

OFERTA TA INFINITO?

 E contesta ta bin a raiz di e pregunta di e portal aki, si e oferta di un interes mas abou cu Hulanda a priminti Aruba, ta mara na un ‘deadline’ otro cu 1 di januari 2024 of cu si e oferta ta keda valido ‘pa semper’. Segun van Huffelen, no a regla un otro fecha cu 1 di januari 2024 pa e interes abou. Pesey esey kier men cu gobierno Hulandes mester tuma un otro decision riba esaki. Y riba esey, e no kier adelanta kico por pasa pasobra e no sa. 

MIENTRAS E TEY

Secretario di estado demisionario Alexandra van Huffelen a indica si, cu mientras cu e t’ey, e lo por bringa pa reduci e interes unabez cu gobierno di Aruba cera un acuerdo gubernamental riba e rijkswet pa supervision financiero RAFT. Pero e no por adelanta riba loke tey pasa. Por scucha e declaracion di Van Huffelen riba e tema, AKI.