Pareha doño di cacho cu a morde nan nieto mortalmente, a keda absolvi legalmente

AMSTERDAM – Corte a absolve e pareha doño di un cacho di rasa herder, cu na 2019 a morde te mata nan nieto. E huez a sigui e conseho di OM cu dialuna a pidi pa absolve e pareha. E mama di e criatura a entama e caso contra su awor ex suegronan.  

E CASO

Tabata na 2019 cu e criatura Robin a wordo mordi mortalmente pa e herder di su welo y wela. Esaki a sosode ora cu e baby tabata den cuido di e welanan nan cas na Diemen. E momento cu e accidente a tuma lugar, e opa, e baby y e cacho tabata hunto den e camber. E opa tabata sinta no mucho leu di e baby, pero e cacho diripiente a actua y a morde e baby. E baby tabata asina seriamente herida cu aunke e la keda opera, e la fayece dos dia despues. A consecuencia di e accidente, autoridad Hulandes a mata e cacho. 

ATAKE SORPRENDI

E caso den Corte tabata basa riba e pregunta si e welonan por a premira e atake di e cacho. E welanan mes ta pensa cu no. Nan a cuida e baby mas biaha y riba e momentonan ey, e cacho tabata tambe den e camber. Segun e welanan, nunca antes tabatin incidente entre e baby y e herder. Pesey nan no a anticipa e peliger.  

EXPERTO DI CACHO

Durante e caso, tabatin un experto di cacho di Universidad di Utrecht presente. E la splica cu ora cu tin un cacho herder y un mucha hoben den e mesun camber, e doño di cacho mester semper tene e dosnan den bista. Tambe si cos ta bay bon. Un herder por mira e baby of mucha como un peliger y atake diripiente. 

ACCIDENTE FATAL 

Ministerio Publico a yega na e conclusion cu e welanan a tuma un risico door di laga e mucha den un area hunto cu e cacho, sin cu a tuma medida di seguridad extra, of a tene e cacho mas den bista. Pero, e welonan no por a premira cu e cacho lo a ataca e baby, segun Huez y OM, y como tal nan lo no a comporta nan mes criminalmente responsabel. E huez a papia di un accidente fatal. Cu e welo a sigui curso di comportacion di cacho y cu e welo tabata den e cercania ora cu e mordi a tuma lugar, tabata un factor ora cu a absolve e pareha.