Tjon: Lo no otorga ningun tipo di asilo na personanan cu drenta Aruba illegal cu boto

ORANJESTAD - Pais Aruba lo no otorga ningun tipo di asilo na e personanan aki cu a purba di drenta Aruba na un manera ilicito manera cu boto manera ta sosodiendo ultimo dianan y tempo. Asina minister di Husticia Rocco Tjon a bisa diamars. Diamars, den oranan di marduga, nos radarnan a tuma nota di un boto biniendo den direccion di Aruba. Mesora e 'Metal Shark' di Kustwacht cu asistencia di Cuerpo Policial di Aruba (KPA) su helicopter, a dirigi nan mes pa asina intercepta e boto aki. Ta trata di 11 hende homber Venezolano y un hende homber Colombiano (12 persona total). Abordo di e lancha a tuma nota di diferente pakete, cu mas di 600 kilo di substancia cual ta bou investigacion. E 12 personanan a ser entrega na KPA y e lancha cu nan a nabega riba dje a sink eventualmente.

RADAR NOBO A YEGA

Na mes momento, nos ta anuncia cu e di cuater (4) radar a yega Aruba, y lo wordo instala na inicio di aña 2024. 

RIESGO HALTO

Ministerio di Husticia y Asuntonan Social tambe a pone enfasis riba cada ken cu tin intencion pa drenta Aruba na un manera ilicito, pa porfabor no haci esaki, pasobra bo lo sali perhudica. E ta di riesgo halto y sumamente peligroso cu consecuencianan fatal, y si logra drenta Aruba, bo lo wordo deporta bek sin oportunidad di asilo. E mandatario di husticia a sigura cu  pais Aruba ta inverti hopi den tecnologia, personal y e strategisch grensoverleg. Manera ta conoci e groeifonds pa cu esaki a keda aproba, como tal lo bay inverti aun mas pa asina fortifica aun mas e siguridad na nos frontera.