AMMF ta raporta otro caso di varamento di tonino na Eagle Beach

ORANJESTAD - Recientemente, Aruba Marine Mammal Foundation (AMMF)  a ricibi alerta pa asisti na un incidente di varamento di un tonino na Eagle Beach.  Un tonino joven a wordo separa for di su grupo di tres cu tabata acercando Eagle Beach buscando refugio, a causa pa e conmocion ora nan a wordo persegui y rondona pa jet skier nan. E tonino a tuma rumbo pa costa, caminda e a topa cu mas acto di molester for di usario di laman, cu a conduci finalmente na su varamento. Afortunadamente, turistanan preocupa y un compania di alkiler di jet ski a alerta autoridad nan. 

RESCATE DI TONINO

Cuater usario di laman a  brinda sosten na e tonino te ora cu e ekipo di reskate di Aruba Stranding Network (ASN) a yega y a asumi encargo di su cuido. E responder nan di ASN, Natasha Silva, Anita Nijhuis, y Angiolina Henriquez, a evalua y yuda e tonino den awa, mientras cu Yessy Arends a colecta informashon di testigo y yuda pa mantene e multitud riba un distancia.  E tonino tawata di e especie Pantropical spotted dolphin (Stenella attenuata ) cu un largura di 1.7 meter. E tawata tin diferente cicatriz fresco y biew,  tawata den bon condicion, activo y alerta. E tabata mustra debilita di cansancio. Despues di un periodo di recuperacion cu sosten trankilo pa drief e tonino a calma, recobra forsa,  y prome cu bahada di solo exitosamente a landa riba su propio forsa bai afor.

LESION Y CICATRIZ 

Resultado preliminar ta mustra cu algun di e lesion nan fresco riba e tonino su curpa ta probablemente causa pa e proceso di stranding mes, mientras cu algun marca ta parse di a wordo causa pa su mesun especie di tonino mes. E cicatriz biew di varios corta paralel riba su lomba por a wordo causa pa golpi cu propeller di lancha, enredamento, of djente sea di Pseudorca of Orca.

Pesceo di long line, un practica ilegal na Aruba, tambe ta conoci pa causa varios lesion na tonino. Notablemente, dos lancha di pisca longline Venezolano a keda intercepta pa Wardacosta di Aruba e dia prome cu e incidente di varamento aki. E causa inicial pa cu e grupo di tres dolfijn aki drenta busca refugio ta ainda no ta determina. Un evaluacion comprensivo di e diferente lesion nan  di e tonino ta den proceso.

Stenella attenuata (Pantropical spotted dolphin) 

E  especie aki ta identificabel pa su patron di color bipartito, cu un manta shinishi scur skerpi defini y un pedunculo dividi den dos color, e parti ariba scur y e parti abao color cla. Un adulto tin averahe di 210 cm di largura  y 100 kg di peso. E recien naci tin un averahe 85 cm di largura. Nan ta biba maximalmente 46 aña. E tonino nan aki cu ta relativamente chikito y flaco ta hopi acrobatico, entre otro cu salto vertical y ta wordo mira ta  “bowride”. Nan ta biba den grupo grandi di centenar pa miles, y ta asocia regularmente cu otro especie di tonino. Nan alimentacion  ta consisti di pisca chikito epipelagico, calamar, y crustaceo. Pisca bulado ta un di nan cuminda preferencial.

PROTECCION DI TONINO

Mammal marino tin cu subi na superficie pa respira aire cu nan pulmon  y tradicionalmente tonino ta busca refugio den laman no profundo y trankil di e banda sotavento di Aruba,  ora nan ta debilita y vulnerabel, manera durante lesion, cansancio of parto.  E tonino mester di espacio amplio cu condicion sin disturbio pa por reposa y recupera.  AMMF ta urgi Aruba su publico pa no causa molester na tonino,  por ehempel door di purba acerca of persigui nan, y pa respeta nan necesidad di espacio. E accion nan di navegante y landado ta impacta directamente e bienestar di mammal marino.

Na Aruba,  bao e Decreto Nacional pa Proteccion di Flora y Fauna Endemico (AB 2017.48) y e Ordenansa di Naturalesa (AB 1995.2) tur especie di tonino y bayena ta clasifica como fauna amenaza y proteha,  prohibiendo pa intencionalmente mata, captura, causa nan daño of estorbo.  No ta permiti pa causa molester y pone nan bienestar bao amenaza. Tur tonino y bayena tambe ta proteha pa e protocol di SPAW, un acuerdo regional pa proteccion  y uzo sostenibel di biodiversidad costera y marino den e region di Caribe. 

Prioridad di AMMF ta e bienestar di mammal marino, incluyendo e tonino den refugio y den caso di varamento, pa medio di educacion na usario di laman pa aumenta comprendimento pa e importancia di e codico di conducta di seguridad ora di tin un encuentro cu mammal marino. Un programa di educacion a wordo desaroya y lo wordo ofreci den futuro cercano.

Con pa yuda den caso di varamento di tonino

Kico no pa hasi: Si bo encontra un tonino pega riba beach, nunca lastrele of rankele na su rabo of pectoral fin nan, pasobra e por causa lesion severo. No purba di rescatele riba bo mes y transportele bek lew den laman profundo. Accion nan aki, cu ta wordo haci sin evaluacion y experiencia adecua, por tin consecuencia grave pa e bienestar di e tonino. Ora di ta debilita, e  por hoga. Obligando e tonino debilita pa keda forsa su mes pa yega na su refugio por causa malestar adicional y impedi su recuperacion.

Kico si pa hasi: Rapidamente yama ASN pa ayudo na 5924333 (AMMF) of 100 (polis). Relata den bo yamada: e localidad usando un punto de referencia (manda un location-pin via whatsapp, si ta posibel); fecha y ora di bo observacion; si ta morto of bibo; e tamaño y cantidad di mammal marino envolvi;  si e ta den awa of riba beach;  si tin multitud di hende of otro molester;  bo nomber y informacion di contacto;  si bo ta disponibel pa yuda. NOTA: E potret actual ta di un varamento di tonino na 2017 na Eagle Beach y ta wordo usa aworaki solamente como ilustracion.