Despues di e accidente, situacion di presidente di SPA Rodney Solognier ta critico pero stabiel

ORANJESTAD – E situacion di e presidente di e sindicato di polis SPA, Rodney Solognier ta critico pero stabiel. Asina Noticiacla.com a compronde di su famia diaranson mainta. Ayera e tabata envolvi den un accidente serio unda cu su auto a dal frontal den un otro auto na altura di Koyari. Chauffeurnan di ambos auto a resulta seriamente herida ora cu nan a keda pega den nan respectivo auto y mester a keda rescata pa bomberonan prome cu nan por a wordo transporta pa hospital cu urgencia. Mester bisa tambe cu no ta conoci pa Noticiacla.com kico e estado di e señora ta, aunke a haci e intento pa haya informacion tambe. Pa loke ta Solognier, ayera mes a oper’e pa purba stabilisa su situacion. A keda cu awe mainta lo mester a bolbe opera e agente policial. Y awe mainta despues e famia a informa cu e ta ‘critico pero stabiel’. Ayera tardi alto comisario a manda un mensahe di video unda cu e ta manda palabra di sosten pa e famia y e colega, incluyendo cu e ta den oracion di henter cuerpo. Noticiacla ta manda palabra di pronto recuperacion pa tanto e señora cu a accidenta y e presidente di SPA, Rodney Solognier. Pa loke ta e accidente mes, esaki ta bou di investigacion ainda pa determina exactamente kico a sosode cu e accidente aki a tuma lugar. Potretnan ta cortesia di 24ora.com