Segun encuesta, Aruba ta den problema si Wilders forma gobierno na Hulanda

ORANJESTAD – Segun e ultimo encuesta entre usuarionan di Noticiacla, preocupacion ta loke mayoria di esnan cu a participa ta, awor cu politico Geert Wilders (PVV) a gana e eleccion na Hulanda. Wilders ta conoci di no ta un amigo di islanan CAS (Corsou, Aruba y St Maarten), y tampoco BES (Bonaire, St Eustatius y Saba). Basa riba esaki e portal aki a tene un encuesta rapido pa sinti e sentimento. Tambe mayoria di esnan cu a participa, ta pensa cu Aruba lo ta den problema si Wilders y PVV logra forma un gobierno. Un total di 175 persona a participa den e encuesta aki cu a dura 4 dia. 

E META DI ENCUESTA

Un dia despues cu Hulanda a bay urna electoral pa eleccion pa Tweede Kamer, Noticiacla a publica un encuesta chikito pa midi e sentimento di su lectornan. E atencion no tabata asina grandi, pero asina mes e ta duna un bista interesante di kico e usuarionan ta pensa. Algun resultado interesante tambe a sali dilanti, di e cantidad di persona cu a bisa di a sigui e eleccion y tambe cua sexo ta esun cu a domina aki. 

RESULTADO

Pa loke ta e resultado, e sexo masculino a domina den e caso aki unda cu 69% tabata hende homber y 29% tabata hende muher. Pa loke ta e interes pa e eleccion, aunke tabatin ‘poco’ participacion, entre esnan cu a participa, un mayoria abrumador di 94% di e usuarionan di Noticiacla a sigui e eleccion pues e ta confirma cu nan ta interesa den politica Hulandes, cu ta un di e interesnan tambe di noticia di e portal aki. 

REACCION CU WILDERS A GANA ELECCION

A puntra tambe kico esnan cu a sigui e eleccion, ta pensa di e idea cu Wilders a gana e eleccion. Esaki no ta necesariamente nifica cu e lo por logra forma, sino cu e la simplemente gana e eleccion. Aki mayoria cu a participa, 43% a bisa cu nan ta preocupa. Pero ora cu puntra si nan tabata sorprendi, e cantidad a baha te 35%. Di otro banda 27% ta bisa cu nan ta contento cu e resultado. Un grupo mas chikito, 14% ta bisa cu nan tabata desapunta mientras 3% a bisa cu nan no tin opinion.  KICO TA PASA SI WILDERS LOGRA FORMA GOBIERNO

A sigui cu e pregunta cu kico ta pasa si Geert Wilders logra forma un gobierno bou di su mandato, esta Gabinete Wilders. Aki mayoria di esnan cu a contesta e pregunta, 38% a bisa cu e ora ‘Aruba ta den problema’, mientras cu 27% no sa kico por pasa si Wilders lidera e proximo gobierno. Un grupo mas chikito, esta 23% ta bisa cu nan ta kere cu nada lo pasa cu Aruba y cu tur cos ta sigui normal manera e ta aworaki. 

SI WILDERS NO LOGRA FORMA GOBIERNO

Tin tambe e posibilidad cu Wilders no ta logra forma gobierno. Riba e posibilidad aki a pone como opcion den e encuesta algun partido cu tambe a haya basta voto y cu ta den contienda pa forma un gobierno en caso Wilders no logra. Aki mayoria a scohe pa e combinacion di partido Groenlinks/PvdA pa forma gobierno (40%). Loke a hala atencion ta cu e opcion cu ta sigui cu 28%, ta eleccion nobo. Pues e di dos grupo mas grandi ta kere cu si Wilders no logra forma gobierno, cu lo bin of mester bin eleccion nobo na Hulanda. Algo cu hopi na Hulanda ta papiando di dje tambe. E siguiente partido cu ta bin na remarke, ta NSC cu 19% y VVD na ultimo cu 13%. 

 DISCLAIMER

Manera tur encuesta, noticiacla ta informa y ta conciente cu e resultado di e encuesta no ta scientifico y no ta duna un bista completo mirando cu ta solamente esnan cu tin acceso na internet y cu ta usuario di Noticiacla. Asina mes, e encuesta su resultado ta conta cu participacion di hende di henter e isla y di tur edad cu ta menciona den e encuesta. E ta yuda duna un bista di kico ta pensa eyfo.