Partidonan CDA, BBB y VVD ta discuti posibilidad cu PVV

DEN HAAG – Partido CDA su lider Bontenbal no ta descarta participacion den un siguiente gabinete. Solamente no cu PVV. Pa aworaki e ta laga e trabou na e partidonan cu a gana eleccion. E mes ta hopi desapunta cu e resultado malo di apenas 5 asiento pa su partido. E la declara prome y despues di eleccion cu e no ta sinta si cu PVV. Pero cu otro partido e no tin problema.

BBB

E lider di BBB, Caroline van der Plas si ta dispuesto pa traha y goberna cu PVV. E kier un coalicion di VVD, NSC y PVV, "basta Geert move un poco” nificando cu e mester adapta su forma un poco. Segun van der Plas, Wilders a bisa cu e lo bira mas ‘suave’. “Ta importante pa sa si realmente e ta bay haci esey” van der Plas a bisa. Plannan di PVV pa prohibi Koran y Nexit no ta permissible pa BBB. E resto ta ok.   

VVD

Pa loke ta e partido VVD, e lider Yesilgöz a bisa cu e kier papia prome cu e fraccion riba e participacion na un gabinete cu Wilders na Cabez. E no kier bisa ainda si e ta wak un espacio den un gabinete cu Wilders, of si ta acepta Wilders como premier. Den e campaña e la bisa caba cu e no ta cera porta pa Wilders pero no por traha cu Wilders como Premier.