WEB a investiga keho di supuesto calidad malo di awa na Primavera

ORANJESTAD - WEB Aruba NV diahuebs atardi a reacciona publicamente riba e keho cu a keda publica e siman aki riba e medio 24ora.com di posibel mal calidad di awa, den e caso aki specificamente den e bario di Wayaca/Primavera. Segun e compania, nan a tuma nota di informacionnan cu a keda publica “tocante posibel awa cu lo a sali troebel y cu color cu no ta normal for di tuberia di un cas y tambe di caso di awa cu lo ta smaak brak”.

A CONSTATA E PROBLEMA NA PRIMAVERA

WEB a bisa cu nan ta tuma kehonan masha serio. “Salud y bienestar di nos clientenan ta nos prioridad principal. Inmediatamente nos personal specialisa a forma un team pa bay haci investigacion. Na Primavera a bin constata cu na un cas tin trabaonan andando pa cambia tuberia. A papia cu e personanan na e percela y a bin compronde cu nan ta cambiando e tuberia di e cas di tubonan di Koper pa tubonan hdpe (PVC flexibel) y cu ta nan mes a bay media” e compania a sigui bisa.

KICO PA HACI

E personal di WEB a splica e personanan cu na momento cu ta cambia tuberia, bo por haya e efecto cu e awa despues ta sali temporalmente cu color troebel. Den trabaonan cu tuberia esaki ta conoci como “Water Flushing”. Sedimentonan of mineralnan acomula den e tuberia anterior por a sacudi of move durante trabaonan y por cambia e color di awa temporalmente. Esaki por sosode tambe ora cu tin trilling di e suelo ora cu den vecindario di e tubonan tin construccion of cobamento andando.

RECOMENDACION 

E team di WEB a recomenda e persona pa despues cu e caba di haci tur e cambio di tuberia, pa laga e awa core pa flush out e sistema y si e awa no claria y bira transparente normal e por yama WEB pa bin dune asistencia.

KICO PA HACI DEN CASO DI IREGULARIDAD

Den caso di cualke iregularidad di awa na bo propiedad, ta importante pa notifica WEB inmediatamente. Tuma contacto cu WEB na 280-4600.