Segun encuesta di Noticiacla, 53% ta pro matrimonio di mesun sexo na Aruba y Corsou

ORANJESTAD – Aruba ta keda dividi riba e tema di matrimonio di mesun sexo. Mientras cu diabierna mainta na Hulanda, Corte di Casacion a trata e sentencia di aña pasa unda cu huez di apelacion a habri caminda pa matrimonio di mesun sexo, Noticiacla a tene un encuesta entre su lectornan riba e tema unda cu 804 persona a participa durante un periodo di 2 dia. Un encuesta hopi simple e biaha aki, unda cu mester a djis contesta si ta pro of contra pa Aruba y Corsou habri matrimonio di mesun sexo of no, of si e hecho cu tin union civil actual ta suficiente. Aki 53% a bisa SI na matrimonio di mesun sexo na ARuba y Corsou y 33% a bisa NO. Un 14% a bisa cu union civil aworaki ta suficiente. Mientras cu SI a ‘gana’, e cantidad no ta suficiente convincente pa bisa cu e ta e loke ‘mayoria’ ta scohe.  

DISCLAIMER

Manera tur encuesta di Noticiacla, e resultado aki tambe ta anonimo, y no scientifico. Ademas Noticiacla ta conciente cu esaki ta un encuesta electronico pues solamente acesibel na esnan cu tin internet y cu ta sigui Noticiacla.com. Loke si ta e caso ta cu e cantidad ta uno cu ta cubri henter Aruba, den tur districto y di tur edad, y cu e cantidad pa regla di encuesta, ta suficiente pa duna un ‘indicacion’ kico ta biba eyfo. E encuesta a cuminsa diaranson merdia 8 di november y a termina 10 di november 2023 pa cuadra cu e dia di e tratamento di e caso di Casacion riba e tema.