Reaccion riba encuesta di Noticiacla: Partidonan MAS, ACCION21, LPR, Gerlien Croes y PDP

ORANJESTAD – Un dia despues cu Noticiacla a publica e resultado di e encuesta riba un grupo specifico di partido politico na Aruba, e lidernan di e respectivo partidonan y tambe cu tin intencion di lanta partido, a reacciona pa e portal aki. Na tur, comprendiblemente nan a keda contento cu e reaccion en general, ya cu e resultado tabata uno unda cu tabatin un interes casi similar pa e partidonan aki, nificando cu tin atencion riba nan. Noticiacla a duna tur e oportunidad pa reacciona riba e resultado y tin esaki tambe documenta. Cada uno a haya un chens igual pa reacciona y algun a probecha di e oportunidad y otronan a keda mas reserva, aunke si a reacciona. 

REACCION RYCOND SANTOS DO NASCIMENTO

E reaccion di Rycond Santos do Nascimento ta bisa:” E encuesta a yena mi cu hopi alegria y satisfaccion. E ta manda un señal cla cu e panorama politico ta firme den un rumbo nobo y cu Pueblo ta cambiando na fabor di politica alternativo. Awe e grupo di voto alternativo ta e mayoria, mientras we grupo cu ta vota AVP y esun cu ta vota MEP a bira un minoria. P’esey lo ta bon pa Noticia Cla habri su plataforma pa debate riba topico di interes general pa asina Pueblo por pone den balansa e diferencia di opinion, pensamento y filosofia entre tradicional y alternativo”.

REACCION GERLIEN CROES (PARTIDO NOBO)

Mientrastanto Gerlien Croes tambe a reacciona:”Mi a tuma nota di e encuesta y resultado, cu esaki ta duna en todo caso señal cu pueblo tin interes pa otro alternativa den politica y cu ta prematuro ainda pa conclui cu pueblo a hasi su escohencia caba. Ta obvio cu mas lo bal pa pueblo tin e contenido cu cada politico y partido presente na dado momento”.

REACCION MIGUEL MANSUR (ACCION21)

Pa loke ta e lider di e partido ACCION21, Miguel Mansur, esaki tabata su reaccion: “Nos ta contento di mira cu continuamente lesadonan di NoticiaCla ta scoge ACCION21 como un di nan partidonan preferi tanto ora ta compara cu otro partidonan nobo y tambe ora ta compara cu tur partido. Esaki ta un muestra di confiansa den e trabao cu nos ta bin ta desplegando den Parlamento. ACCION21 a demostra riba diferente ocasion nos compromiso cu pueblo di Aruba y interes general. Nos tabata e unico partido di oposicion cu a vota cu gobierno riba e ley di normering topinkomens paso e tabata lo corecto pa haci. Nos a vota contra presupuestonan iresponsabel cu a hiba na recomendacion di un aanwijzing pa CAft. Nos a para fuerte contra e deal cu Eagle LNG, contra corupcion na Arubahuis, contra abuso di DRH etc. Nos ta e unico fraccion den Parlamento cu a bin cu inciativa di ley cu a origina durante zittingsperiode 2021-2025, dos te awor pero tin tres mas na caminda. Nos compromiso cu nos plan di partido y principionan nunca a cambia, nos a para firme na fabor di RAft, nos a para firme na fabor di igualdad matrimonial y nos ta para firma pa un Aruba caminda tur hende ta goza di comodidad financiero. Nos ta reconoce cu pa tur hende biba miho y tin e oportunidad di alcansa nan potencial maximo, nos mester reforma nos sistema democratico. Nos a caba di introduci un ley pa modernisa ‘ouderschapsverlof’ treciendo nos leynan den linea cu e beneficionan na Hulanda y BES paso Aruba no por keda atras”. 

REACCION LEONARDO FIGAROA

E lider hoben di e partido politico PDP, Leonardo Figaroa tambe tabatey: “Encuesta di Noticia Cla ta un señal cu PDP ta un alternativa cu ta estableciendo su mes cu pasonan sigur y firme.

Mi ta wak e positivo cu 2.3% ta sostene PDP. Nos ta un partido nobo cu ainda no a presenta nos planesnan pa Aruba. E hecho cu tin politiconan estableci caba cu ta parlamentario pa mas di 2 ciclo parlamentario ta hopi normal cu PDP pa aworakinan den e encuestanan lo ta abao.

Interesante pa nos Partido ta pa mira cu solamente 37% di es personanan cu a yena e encuesta a indica di no vota pa partidonan nobo. Esaki nos lo por traduci cu tin un insatisfactorio hopi grandi cu mas o menos 63% di e grupo aki cu no ta kere den e Status quo, e politica tradicional.

E ta importante pa tin recurso financiero pa por financia tur e planesnan ambicioso cu nos tin. Mi proposicion ta pa nos por tin un kabinete completamente diferente.

Nos vision riba e proximo kabinete:

Nos ta trahando duro pa convence Aruba, cu un zakenkabinet ta e miho alternativa. Mi ta kere cu e lista di PDP pa eleccion di 2023 lo tin candidatonan parlamentario. Segundamente nos ta trahando pa por brinda Aruba cu candidatonan ministerial riba e lista di Partido Direccion Politiea.

Pami un vak minister ta e miho alternativa, si Aruba vota pa PDP. Y mi por confirma na Noticia Cla cu PDP tin 3 candidato pa Vak minister riba e tereno di Finansas Publico, Enseñansa, Justicia. Finalmente. Ademas, nos tin un candidato cla cu nos tin confiansa pa representa Aruba na Union Europeo. 

Aruba mester un rumbo nobo, mi sa cu nos mester un kabinete cu ta para firme pa e direccion correcto. Pesey mi mensahe pa Aruba ta pa sostene e vision di e siguiente generacion”.

MARISOL LOPEZ TROMP DI MAS

Y finalmente e reaccion di Marisol Lopez Tromp di MAS:” Sigui hasi encuesta y polls pa asina tin un bista di e trendnan politico di Aruba na caminda pa eleccion”.