Encuesta: Interes ta igual pa partido MAS, ACCION21 y di Gerlien Croes

ORANJESTAD – Segun e encuesta mas recien di noticiacla, tin un interes igual pa partidonan MAS (di sra Marisol Lopez Tromp), ACCION21 (di sr Miguel Mansur) y esun di sra Gerlien. Tur tres partido a haya 16% di e escogencia entre 508 persona cu a contesta e pregunta ey, reparti riba henter isla di Aruba. E encuesta tabata specificamente entre un grupo selecta di partido politico, scohi netamente pa e meta di e encuesta aki.

E RESULTADO

E resultado manera indica caba, tabata practicamente un empate, ora cu coi e percentahenan total unda cu tur tres partido   menciona a logra haya 16% di e escogencia. Asina mes, individualmente, partido MAS tin 2 ‘voto’ mas cu esun di sra Gerlien Croes cu 83 voto contra 81 voto respectivamente. E partido ACCION21 ta na di tres lugar cu 80 voto. Pero mirando e margen, tur tres ta yega na 16%. Ta sigui e partido di sr Ryçond do Nascimento cu 65 voto na 13%. Y finalmente e partido PDP di sr Figaroa cu 12 voto na 2.3%. 

INTERES PA OTRO

Tambe tabatin e opcion ‘niun’ pa esnan cu a participa den e encuesta, cu a dicidi cu nan lo no vota pa ningun di e partidonan cu a keda sugeri den e encuesta. E cantidad cu a scohe e opcion aki ta basta halto tambe 37%. Pero e mayoria (si uni tur e otronan hunto)  a scohe pa un di e opcionan di partido. Mester bisa si tambe cu esun cu a haya menos ‘voto’ tabata e partido PDP di sr Leonardo Figaroa. 

DISCLAIMER

Mester clarifica tambe cu Noticiacla a scohe concientemente pa un grupo di partido specifico, concientemente lagando otro partido afo. E meta e biaha aki tabata pa sa e pensamento di e usuarionan di noticiacla riba e partidonan specifico selecta. Asina mes, a pulsa solamente e interes general entre e partidonan menciona, sin bay den detayes di nan programa di partido y otro puntonan di contenido.  Den e encuesta aki, e cantidad di persona cu a participa ta 519 persona dentro di 5 dia, cu pa regla, ta representativo suficiente, reparti entre tur 6 districto y persona di edad entre 18 aña y mas di 65 aña. Ademas noticiacla ta conciente cu esaki no ta un encuesta scientifico y cu ta disponible solamente na usuarionan di e portal aki cu tin aceso na internet.