Van Huffelen no ta di acuerdo cu Wever-Croes, cu e la malinforma Tweede Kamer

DEN HAAG – Secretario di estado Hulandes pa Asuntonan di Reino Alexandra van Huffelen no ta reconoce su mes den e declaracion recien di Prome Minister Evelyn Wever Croes na adres di e mandatario Hulandes. Asina e mandatario a reacciona pa Noticiacla diabierna, tumando nota di e declaracion haci di premier Wever den e articulo na hulandes, bisando cu van Huffelen a duna informacion incorecto na Tweede Kamer. “Ademas den e contexto Hulandes esta inaceptable cu un minister lo mal informa Parlamento” e mandatario a sigui bisa. Pues e mandatario Hulandes no a aprecia e declaracion aki, y no ta di acuerdo cu esaki. E mandatario a caba bolbe Hulanda despues di a pasa un siman na Corsou y St Maarten pa trata primordialmente e tema di Tula y e situacion di Ennia. E la ‘skip’ Aruba pasobra Aruba no tabata cla p’e y e premier ademas lo no tabata na Aruba. Algun dia prome, e mandatario di Aruba a emiti un comunicado caba, na papiamento unda cu aki tambe e ta reclama e mandatario Hulandes di no ta suministra informacion corecto. 

E DECLARACION DI PREMIER WEVER

Tabata e siman aki e prome mandatario Hulandes a emiti un comunicado na Hulandes, mas sigur dirigi pa e publico (y gobierno) Hulandes cu e cabez bisando cu ‘Aruba ta coregi e informacion eroneo di Hulanda’ y cu ‘Aruba tin bon supervision financiero’. Segun e articulo ta continua bisa, e articulo ta un reaccion directo riba ‘un carta di secretario di estado demisionario Alexandra van Huffelen cu a duna informacion incorecto na Tweede Kamer”.  E resto di e articulo e prome mandatario ta pinta un bista di con su gabinete a drecha e situacion financiero y con e situacion actual ta. Ademas, e premier ta culpa Hulanda di no a reacciona ainda riba e proposicion ultimo di Aruba y cu ‘mientras cu Hulanda no reacciona riba e proposicion di Aruba, e ley en cuestion no por wordo adapta’, culpando Hulanda di e tardansa. 

HULANDA NO TA RECONOCE ESAKI 

Den e reaccion pues diabierna for di e mandatario pa Noticiacla, e la mustra cu e no ta reconoce su mes den e loke cu prome minister Wever ta bisa di dje, y tambe, cu ta inaceptable cu un mandatario ta mal informa Parlamento.