Wever-Croes:Cierto expresionan di van Huffelen pa cu Aruba ta robez

Wever-Croes:Cierto expresionan di van Huffelen pa cu Aruba ta robez

Posted on 09/18/2023 3:58 pm AST | Updated on 09/18/2023 4:01 pm AST

ORANJESTAD – Segun premier Evelyn Wever, cierto expresionan di secretario di estado Hulandes Alexandra van Huffelen siman pasa den Tweede Kamer ta robez. Ademas segun e premier, hopi hende, incluyendo periodista ta mira mucho television, y den e caso aki television hulandes, y mas specifico ainda, e parti politico. E mandatario a implica durante su conferencia di prensa dialuna mainta cu tin hopi hende cu ta prefera kere loke e ta mira y scucha na television Hulandes envez di loke ta pasa den Politiek Aruba. “Boso mester bin sinta kinan den Parlamento, anto wak e debatenan di BO Parlamento di Aruba” sugeriendo cu esnan cu tin keho, ta wak mucho, of solamente esun di Hulanda y no di Aruba. “Mare esnan manera abo ta papiando (e tabata referi na periodista di e portal 24ora.com) ta poniendo tanto atencion na desaroyo di Aruba mane boso ta pone na desaroyo na Hulanda”, e mandatario a bisa. E mandatario a sigura cu tur informacion pertinente na caso di RAFt a keda presenta na Aruba den Parlamento, unda cu varios pregunta cu prensa a haci dialuna (awe) y ta haciendo (incluyendo di Noticiacla recientemente), a wordo contesta den Parlamento, y a keda transmiti en bibo pa tur hende mira. “Pero diripiente pasobra na Hulanda tabatin algun ora di transmission, pa tur hende esey a bira lo sagrado”. E mandatario a bisa di ta lamenta e actitud ey. Segun e mandatario, nos tin cu kere den nos hendenan. 

CIERTO EXPRESION DI VAN HUFFELEN TA ROBEZ

Segun e mandatario a sigui bisa, secretario di estado van Huffelen a duna cierto expresionan durante e debate siman pasa, cu segun Wever Croes, no ta corecto. E mandatario ta referi na e hecho cu e mandatario Hulandes ta bisa cu Aruba a manda su propuesta un dia prome cu e deadline di 1 di September ultimo riba e RAFt haciendo como si fuera no a ricibi mas propuesta. E mandatario di Aruba a coregi esaki y bisa cu Aruba a manda numeroso propuesta pa Hulanda (e la menciona cu ta como 10 proposicion:red) y e ultimo cu e la manda, tabata netamente esey, esta esun mas recien. Pero segun e mandatario di Aruba, ningun di e propuestanan anterior, Hulanda tabata aproba of haya bon. E ultimo e mandatario di Hulanda a bisa ta dispuesto pa trata y papia ariba. Segun Wever Croes, lamentablemente tin hende ta core kere loke e politiconan Hulandes ta bisa, enbez di kere loke nan ta mira y lesa aki na Papiamento. Pa scucha e parti aki di e premier awe mainta, click AKI. 

  

  • Varadero
  • Powered by SETAR