Gobièrnu i CBCS lo kombiná pa skapa Fondo Penshun Ennia

WILLEMSTAD.- Gobièrnu di Kòrsou lo sòru pa pone e fondonan disponibel, miéntras ku Banko Sentral (CBCS) tambe lo kontribuí ku su parti pa skapa e fondo di penshun di Ennia. Den  transkurso di ayera nochi Promé Minister di Kòrsou den su kalidat di representashon máksimo di gobernashon a emití un boletin den kual e ta informá dje posishon ofisial di gobièrnu pa loke ta e kaso di “Ennia Caribe Leven NV”, kual ta e nòmber ofisial dje sekshon aki. E ta splika ku e kompania di seguro aki ta un kompania privá ku a operá bou di supervishon di Banko Sentral i ku na 2018 a hañ’é den problema finansiero dor di transakshonnan iregular ku i via di kompanianan filial. E kompania aki por ser konsiderá komo unu di importansia pa e union monetario entre Kòrsou i St. Maarten. Esaki ta nifiká ku bankarota di Ennia lo por trese un desaroyo sano dje sektor finansiero na peliger den e union monetario.

E ta bisa mas aleu ku, pa evitá un bankarota di Ennia, Banko Sentral a hasi un apelashon urgente riba gobièrnu pa haña sosten finansiero. Na bienestar di e 30.000 portadornan di pólisa, di kual tin 25.000 bibá na Kòrsou, gobièrnu a tuma e petishon di Banko Sentral na konsiderashon. Den e kòmbersashonnan a deliberá riba e posibilidat di un “doorstart”, pues un kontinuashon dje aktividatnan, pero bou di un kompania nobo ku lo ser lantá. Esaki lo sosodé a base di un inyekshon finansiero di Nafl. 1.2 miar den forma di un fiansa for di Hulanda.

Echo ta ku Hulanda a mara e refinansiamentu dje fiansa di Corona di Nafl. 911 mion na un solushon pe problema di Ennia. Pero durante e negosiashonnan a bin sali na kla ku den kaso ku akseptá e dos fiansanan grandi aki pareu, ku huntu lo forma un Nafl. 2 miar lo no por ser kargá dor di Pais Kòrsou, ya ku na momentu di ehersé su tareanan òf na momentu ku tin di hasi e invershonnan nesesario pa kresementu ekonómiko den e próksimo añanan, ku kosnan lo pega, i esaki sigur no ta e intenshon. For di punto di bista finansiero, pais mester keda gobernabel.

P’esei mes tambe Kolegio pa Supervishon Finansiero (Cft) a atvertí na tres okashon riba akseptashon di un fiansa asina, ya ku e kapasidat di Kòrsou pa fia lo ser limitá drástikamente, ku tur e konsekuensianan finansiero ekonómiko i sosial ku esei lo trese kuné pa pais.

A base dje análisisnan ku a tuma lugá a trata di yega na otro posibel solushonnan den kual gobièrnu lo keda ku espasio pa den futuro e por hasi fiansa pa invershon den p.e. infrastruktura, enseñansa i ekonomia, pero Hulanda no a konsiderá ningun, i komo tal a bira imposibel pa akseptá e proposishon di Hulanda. P’esei gobièrnu despues di konsulta ku Banko Sentral a disidí pa durante e 25 añanan benidero pone e medionan disponibel pa por paga penshun di e aseguradonan di Ennia, si resultá ku e medionan propio no ta sufisiente. Un ke otro lo ser strukturá ku asta Banko Sentral lo duna su kontribushon den e solushon skohé ku lo traha riba dje durante un luna dor di ekspertonan di Banko Sentral. NOTA: Texto ta scirbi den Papiamento fonetico di Corsou.