Arnhem riba caso di polis Vos: E ta algo teribel! Hende mester por conta riba polis!

ORANJESTAD – Algo comisario di polis Ramon Arnhem ta considera e caso di agente policial Vos cu ta deteni pa 6 luna caba sospecha di malversacion, algo teribel. “Esaki ta teribel.  Hende mester por conta riba polis. Net nos mester duna e ehempel di ta esun mas integro di tur. Esey bo por spera di polis” Arnhem a bisa den e programa Noticiacla LIVE cu ta pasa diahuebs mainta 11’or. “Ora cu resulta cu no ta asina, esey ta un sla formal den nos imagen” e hefe maximo di polis a sigui bisa. E periodista Tito Laclé a puntra e hefe maximo di polis con e caso aki a afecta e cuerpo. “Mi ta hopi tristo di loke a sosode” e hefe a sigui bisa.

CON TA ANDA CU UN SITUACION ASINA 

Sr Arnhem a splica cu polis ta reflecciona riba nan mes, di con algo asina por a pasa, y nan tin hopi combersacion interno akiriba. “Nos ta hopi ocupa tambe cu e tema di integridad. Nos mester wak tambe unda e puntonan vulnerable ta sinta pero tambe nos ta reflecciona na nos mes. Con esaki por pasa”. 

TENTACION PA MAS PLACA COMO MOTIBO?

A puntra Arnhem si esaki por ta, manera ta mustra den hopi cine y serie policial, e tentacion pa mas placa, ya cu e salario di polis no ta yega. Y ora cu nan mira cuanto placa ta drai den e mundo criminal, tin ta cay pa e tentacion y ta laga nan mes wordo cumpra. E hefe maximo di polis sinembargo no kier kere esaki. “Esaki ta un razon falso. Esta mas placa. Bo a bira polis. Nos mester ta integro y vigilante. E no mester sosode. Nos mester mira den nos mes” Arnhem a cuminsa bisa. Cu hende ta vulnerable ta posibel, y cu nos mester tin bista riba esey, tin cu ta e hecho. “E no ta un excuse, pa bay den tentacion pasobra mi ta wak un criminal gana mas placa. Placa di crimen nunca ta placa” Arnhem a sigui bisa. “Esaki simplemente no mester sosode. Y nunca mi lo papie bon y bisa cu debi cu e ta pasa tur caminda na mundo, e por sosode aki tambe. No. Nos mester djis percura pa e no sosode aki. E comunidad tin derecho riba un cuerpo di polis integro” Arnhem a sigui bisa. “Cu e ta un realidad cu e ta sosode, sigur. Y nos ta ataca esaki sigur, y nos no ta mira na otro cuerpo pa motibo di e comportacion aki. E ta inaceptabel” Arnhem a finalisa bisando. E programa completo di Noticiacla LIVE cu invitado Ramon Arnhem, Alto Comisario di polis di Aruba ta pasa awe mainta 11'or riba plataforma di Noticiacla.