OM: ‘Enfoke’ su ponencia riba screening di minister y rol di PG y Korpschef ta incorecto

ORANJESTAD - E ponencianan cu a wordo haci durante e programa di radio Enfoke tocante e screening di ministernan y e rol di e Procurador-General y e Alto Comisario di Polis,  ta incorecto. Esey tabata e mensahe cu Procurador General Bote ter Steege a sigura dialuna pa medio di un comunicado. Segun e Procurador General, e ta referi na 3 di augustus ultimo, durante transmision di e programa ‘Enfoke’, e presentadornan a haci algun ponencianan incorecto.

E TRANSMISION 

Segun e PG, durante e transmision a, entre otro, papia tocante e screening di ministernan di e gobierno actual. Ey a crea e sugestion cu e Procurador-General no a haci e screening bon, pasobra e Alto Comisario di Polis di esten tampoco lo a haci su trabao bon. 

USANDO LEY DI SCREENING ROBEZ

E PG ta sigui bisa cu durante e transmision, cu un di e moderadornan a mustra specificamente un ehemplar di e Landsverordening integriteit ministers di aña 2021 y a referi na articulo 3 di e Landsverordening aki. A base di e articulo Procurador-General mester duna informacion hudicial durante screening y, pa intervencion di Alto Comisario di Polis, informacion relevante cu ta den existencia den Cuerpo Policial. E Landsverordening aki a drenta na vigor riba prome di januari 2022. Sinembargo e ta recorda cu Gabinete Wever-Croes II a keda instala riba 20 di september 2021, pues e screening di ministernan no tabata basa riba e Landsverordening menciona aki, sino riba e Landsbesluit screening ministers di 9 di september 2013. 

KICO E LANDSBESLUIT TA BISA 

Den articulo 2 di e Landsbesluit aki ta unicamente duna ordo na Procurador-General pa haci referencia den e registro di documentacion hudicial (e asina yama carchinan di castigo). E Landsbesluit ta regla tambe cu e Procurador-General mester limita su mes na casonan finaliza cu a hiba na un condena penal.

PONENCIA INCORECTO 

Esey kier meen segun e PG, cu e ponencianan cu a wordo haci durante Enfoke tocante e screening di ministernan y e rol di e Procurador-General y e Alto Comisario di Polis ta incorecto. Lamentablemente comunidad di Aruba a wordo malinforma.

PERIODISMO CONFIABEL

E PG ta bisa tambe cu periodismo confiable ta di gran importancia pa sociedad democratico, cu no por funciona bon sin ciudadanonan informa y un intercambio liber di ideanan y pensamentonan. “ Den e sociedad habri aki e periodista tin e derecho na busca noticia na un manera liber, y e tin e responsabilidad pa trece noticia veridico, independiente, fair y cu visor habri”.  Den e transmision menciona di Enfoke tocante e screening di ministernan no por papia di esaki, pasobra tabata falta verificacion di e hechonan. “Tanto e Landsverordening menciona previamente (di prome di januari 2022) como  Landsbesluit (di 9 di september 2013) por wordo haya relativamente facil riba internet”.