Na Hulanda a asesina Yiu di Corsou Lavernie Martis

W’STAD/ DEN HELDER - Djasabra último Hulanda a registrá otro kaso di asesinato, kaminda e yu di Kòrsou, Lavernie Martis di 25 aña  a keda asesiná na e siudat di  Den Helder na altura di cafe de Bierbron. Ta asina ku polisnan di Den Helder mester a bai ku urgensia na e cafe ariba menshoná huntu ku ambulans i e servisio di trouma, pa un kaso di tiroteo ku a tuma lugá.Na nan  yegada, a topa ku 2 hòmber gravemente heridá ku bala na altura di garganta i den barika.

Entre  e víktimanan  e yu di Kòrsou Lavernie. Tur 2 e víktimanan a keda transportá pa hospital  ku urgensia. Despues a resultá ku un di 3 víktima a presentá na hospital den un vehíkulo partikular ku herida di bala relashoná ku e tiroteo.  Algun ratu despues Lavernie a fayesé na hospital, despues ku dòkternan no por a hasi nada mas pe.

E tiroteo a tuma lugá djis despues ku polisnan a detené doño di e cafe  relashoná ku un  trafikashon di mas di 1000 kilo di kokaina. Relashoná ku esaki, gobièrnu a ordená pa sera e cafe mas tempran e dia ei.  Durante e tiroteo a surgi un kore kore formal. Segun abitantenan di den bisindario, tur hende a kore bai skonde tras di outo.   Testigunan ku tabata na e sitio,  a rekonosé e hòmber Kevin S. di den Helder, komo esun ku a tira. Despues di su akto el a kore bai  den direkshon di Willemsoord.

Kevin S. no ta un deskonosí pa hustisia. Na aña 2021 el a   keda detené pa su posibel embolbimentu den un tiroteo riba un bibienda den Steengracht den Helder. Aki èks frei di e víktima a paga pa likidá e hòmber òf tira riba dje. Riba imágennan di kámara polis a rekonosé un di e dos hòmbernan komo Kevin. El a keda arestá, pero despues a wòrdu lagá den libertat i no a keda persiguí mas. E otro hòmber ku  tabata kuné si a keda sentensiá na 2 aña i mei di prizòn.

Polis ta en buska di e sospechoso i a hasi un apelashon na tur hende ku sa di su paradero pa yama polis i duna informashon.

Relashoná ku e tiroteo aki i tambe detenshon di e propietario di e cafe kaminda e suseso a tuma lugá, Burgemeester di den Helder a duna òrdu pa sera e cafe inmediatamente i kita e pèrmit di e negoshi ku pa aworakí no por habri su portanan mas. NOTA: Texto ta scirbi den Papiamento fonetico di Corsou.