A haci mescos na Aruba; na Corsou un docter a converti camber di hotel den su practica

WILLEMSTAD - Autoridadnan di inspeccion ayera a bin topa cu un practica ilegal di dokter den un hotel den area di Punda. E dòkter a transformá e kamber di hotèl pa su práktika pa duna servisio na pashènt. Funshonarionan di Inspekshon Ekonómiko di MEO a deskubrí e práktika ilegal aki den kamber di Hotèl, manera nos a menshoná, un hotèl den área di Punda.

Ayera mèrdia despues di a risibí informashon balioso, funshonarionan di Inspekshon Ekonómiko asistí pa un Inspektor di  Wijkteam Punda, a realisá un bishita na un Hotèl den Sentro di siudat. Segun Noticiacla por a komprondé, estando akinan, despues ku a papia ku e persona enbolbí, un dama di nashonalidat venezolano, a drenta den e kamber ku e ta hospedá.

E tim a konstatá ku e señora tin un práktika di dòkter instalá den e kamber. Riba pregunta dirigí na e señora enkuestion di loke a konstatá, el a duna e splikashon ku tur loke tin einan ta pa su propio uso. Realisando un kontrol mas a fondo a haña den un baki di shushi kantidat grandi di angua usa. Noticiacla a komprondé ku e señora a deklará ku ta e mes ta inyektá su mes ku e anguanan aki.

Naturalmente e funshonarionan no por a traga e historia ya ku tabata opvio ku esaki ta un práktika/negoshi kompletamente ilegal riba nos isla.

Tambe a konstatá ku den e kamber tin un “banner” ku tur e servisio ku e persona ta ofresé manera Parkinson, Sklerosis múltiple, Guillain Barre, tendentitis, migren, doló agudo, króniko, strès, depreshon, ansiedat  i un kantidat di servisio ku dòkter ta duna. Tambe a haña su karnèt médiko kaminda por a mira ku el a gradua na Colegio de Medicos estado Falcon. Tambe Noticiacla a komprondé ku e persona aki a hasi petishon na ministerio di salubridat pa por haña pèrmit pa traha na Kòrsou pero a neng’e esaki.

Sin un pèrmit pa establesé negoshi (MEO) i tampoko sin pèrmit pa ehersé  negoshi sigur no por traha riba nos isla. E funshonarionan a pone e  Hefe di Inspekshon Ekonómiko na altura di e situashon.

Seguidamente sr. Cornelis konforme maneho i obligashon a pone Inspektor General di Salubridat kende ta e outoridat máksimo den e kaso aki, na altura di e situashon. Noticiacla a komprondé ku e señora aki lo a hasi meskos na Aruba tambe. Ta masha remarkabel ku ta nos hendenan mes ta kontribuí ku e tipo di práktikanan ilegal aki por tuma lugá.

Nos mes hendenan ta pone nan salu na peliger teniendo na kuenta ku ta tuma servisio na un práktika di dòkter ku no tin struktura i ku ménos ta para responsabel pa su altonan i ku si algu pasa e hende lokal no por kana niun kaminda.

I banda di esaki ta kontribuí pa e personanan aki bin traha na Kòrsou, sakando tur plaka di divisa pa eksterior i nada ta bai den kaha di gobièrnu ku ta su turno tin di kontribuí ku pueblo mes bèk. NOTA: E texto ta scirbi den Papiamento fonetico di Corsou.